BQO-da bıyl áleýmettik nysandar qurylysyna 5,6 mlrd teńge bólindi

Batys Qazaqstan oblysynda bıyl áleýmettik sala nysandary qurylysyna 5 632,811 mln. teńge qaraldy, dep habarlaıdy QazAqparat. BQO qurylys basqarmasy basshysynyń orynbasary Álibek Antazıevtiń aıtýynsha, sonyń ishinde 4 305,799 mln. teńge Ulttyq qordan, 401,403 mln. teńge respýblıkalyq bıýdjetten, 925,609 mln. teńge jergilikti qazynadan berilip otyr.  Osy qarjynyń basym kópshiligi nemese 4 934,978 mln. teńge bilim nysandaryn salýǵa jumsalmaq. Mysaly, Ulttyq qor esebinen bıyl Oralǵa qarasty Derkól aýylynda 600 oryndyq mektep salýǵa 1 062,5 mln. teńge, oblys ortalyǵynda 300 oryndyq №4 mektepke 605,0 mln. teńge, respýblıkalyq bıýdjet qarjysyna Zelenov aýdany Darııan aýylynda 100 oryndyq ınternatymen 300 oqýshylyq mektep qurylysyna 401,4 mln. teńge bólindi. Bul úsh nysan da 2018 jyly salynyp bitpek. Al irgetasy ótken jyly qalanǵan Oralǵa qarasty Zachagan kentindegi «Sarytaý» shaǵynaýdanyndaǵy 900 oryndyq (bıylǵy bólingen qarjy - 1 537,9 mln. teńge, Ulttyq qor), Derkól aýylynda 600 oryndyq taǵy bir mektep (1 602,5 mln. teńge, Ulttyq qor), oǵan qosa Qaztalov aýdany Qaztalov aýylynda 100 oryndyq mektep-ınternat (227,7 mln. teńge, jergilikti bıýdjet) qurylysy bıyl márege jetpek. Sol sekildi Terekti aýdany Podstepnyı aýylynda jergilikti bıýdjet qarjysyna (163,8 mln. teńge) 300 oryndyq mádenıet úıi turǵyzylmaqshy. Sondaı-aq ishki ister departamenti nysandaryn salýǵa 365,384 mln. teńge, qorshaǵan ortany qorǵaý nysandary qurylysyna 168,629 mln. teńge qarastyryldy.