Mınıstrlik aýyl sharýashylyq ónimderiniń eksportyn ártaraptandyrmaq

Qazaqstan Respýblıkasy Aýyl sharýashylyq mınıstrligi ósimdik sharýashylyǵyn ártaraptandyrýdy kózdep otyr. Naqtyraq aıtar bolsaq, bıdaı egistigi azaıtylady. Onyń ornyna jasymyq egistigi ulǵaıtylmaq. Jasymyq ónimderi Úndistan men Pákistanǵa satylmaq. Bul týraly búgin Astanada ótken baspasóz konferensııasynda vedomstva basshysynyń orynbasary Qaırat Aıtýǵanov málimdedi. «Bıylǵy marketıngtik jylda, ıaǵnı 2016 jyldyń 1 shildesi men 2017 jyldyń 1 shildesi aralyǵynda 9 mln tonna astyq alamyz degen jospar bar. Alaıda, aýa raıyna baılanysty bul kórsetkish azdap ózgerýi múmkin. Biraq bizdiń eksportymyz úshin jańa múmkindikter ashylady. Aldaǵy bes jylǵa arnalǵan aýyl sharýashylyǵyn damytý baǵdaralamasy boıynsha bıdaı egistigi alqaby 2 mln 300 myń gektarǵa azaıtylady. Al 2011-2016 jyldar aralyǵynda eldegi 2 mln egistik gektary qysqartylǵan. Degenmen, bul jalpy egistik shyǵymyna áser etpedi", - dedi Aıtýǵanov. Vıse-mınıstrdiń aıtýynsha, qazirgi tańda maıly daqyldardyń ónimin eksporttaý basty nazarda. Sonymen qatar qazaqstandyq sharýalar qazir jasymyq (túrik burshaǵy) ósirýge de den qoıǵan. «Bıyl nut burshaǵynyń egistigin kóbeıtemiz. Oǵan sebep álem boıynsha osy ónimderge degen suranystyń joǵarylyǵy. Bıyl bizdiń joramal boıynsha, 200 myń gektardan jasymyq orýymyz kerek. Bul bizge álem boıynsha egistik kóleminen 5-shi oryn alýǵa múmkindik beredi. Al eksporttasaq, jasymyq eksportynan álemde tórtinshi orynǵa shyǵamyz. Qazirgi tańda bul salada Kanada birinshi orynda. Álemdik naryqtyń 60 paıyzy osy Kanadaǵa tıesili. Olardyń negizgi tutynýshylarynyń qatarynda Úndistan men Pákistan bar. Qazaqstannyń geografııalyq ornalasýyn eskersek, biz bul turǵyda Kanadadan ozyp kete alamyz. Sonymen qatar Taıaý Shyǵys elderi de bizdiń tutynýshy bolar edi. Bul dástúrli bıdaı sharýashylyǵyna qaraǵanda paıdaly", - deıdi mınıstr orynbasary. Q.Aıtýǵanov qazirgi tańda agrarlyq sala boıynsha halyqaralyq naryqtarda básekege qabiletti bolý úshin qajetti ınfraqurylymdar arqyly ónimderdiń qaıta óńdelýi deńgeıin kóterý úderisiniń iske asyrylyp jatqanyn jetkizdi. «Bul úshin byltyrdan beri maqsatty túrde júıeli jumystar júrgizilýde. Mysaly, 15 myń JQSh-ǵa qyzmet kórsetetin 157 kooperatıv qurylyp úlgerdi. Olardyń kesheninde júzden asa sút qabyldaý pýnkti jáne jeti myńdaı otbasylyq mal bordaqylaý alańdary uıymdastyryldy. Aǵymdaǵy jyly kooperatıvter sany eki eselenedi. Aldaǵy bes jylda jarty mıllıonǵa jýyq JQSh men shaǵyn sharýashylyq kooperatıvter qyzmetimen qamtylady», – dep atap ótti Q.Aıtýǵanov. Onyń aıtýynsha, bıyl 1 aqpanynan beri elimizdiń barlyq aımaqtaryndaǵy aýyl turǵyndaryna osynaý aýyl sharýashylyǵy kooperatıvterin qurý jáne kooperasııalardy memlekettik qoldaýdyń jańa mehanızmderi boıynsha túsindirý jumystary júrgizilýde. Bul úshin Mınıstrlik tarapynan AShM qyzmetkerleri men ǵylymı uıymdar ókilderinen qurylǵan sarapshylar toby quryldy. Mundaǵy basty mindet – árbir aýyl azamatyn aýyl sharýashylyǵy kooperasııalary negizderi boıynsha aqparattandyryp, birigip sharýashylyq júrgizýge jáne naqty iske jumylýyna yntalandyrý. Budan bólek, aqparattyq-konsýltatıvtik turǵyda Fermers.kz saıty men 8800 080 8010 call-ortalyǵy (barlyq baǵyttardan qońyraý shalý tegin) qyzmet kórsetýde. Taǵy bir atap óterlik jaıt, óndiristik maqsattaǵy agrarlyq ǵylymǵa ınvestısııa kólemin arttyrýǵa basa mán berilýde. Iаǵnı, ǵylymı zertteýlerdi qarjylandyrý úderisi agrarlyq qurylymdardyń suranysyna oraılastyrylady. Bıýdjet tarapynan qarjylandyrýdyń basty sharty – bıznestik ortadan qarjylandyrý.