Mańyzdy suraqtarǵa – maǵynaly jaýaptar

Parlament Májilisiniń depýtattary Amanjan Jamalov pen Saparhan Omarov Aqtóbe oblysyndaǵy densaýlyq saqtaý salasy qyzmetkerlerimen kezdesip, Prezıdent Úndeýi men Joldaýynda qoıylǵan mindetterge baılanysty áńgimeler qozǵady. Birinen soń biri ile-shala Qazaqstan halqyna arnalǵan bıylǵy jyldyń bul eki qabyrǵaly qujaty birin-biri tolyqtyra túsýimen qundy. Onyń birinshisi Qazaqstan qoǵamyn saıası turǵydan jańǵyrtý jáne demokratııalandyrýdy odan ári tereńdetýge arnalsa, Joldaýda negizinen elimizdi ekonomıkalyq turǵydan jańǵyrtý isine basa kóńil bólingen. Onyń basty joly jahandyq básekege qabilettilikti qamtamasyz etý bolyp tabylady. Bul qalpaqpen uryp ala qoıatyn op-ońaı is emes. Sondyqtan da Memleket basshysy ony ekonomıkalyq ósimniń jańa modelin qurý arqyly iske asyrý mindetin qoıdy. Munyń ózi respýblıka óńirlerine de tyń ári sony serpin berýge tıisti dep tujyrymdady óz oılaryn Parlament depýtattary. Osylaısha Úndeý men Joldaýdyń mańyzy men atqaratyn róline tereń taldaý jasaǵan bıliktiń zań shyǵarýshy tarmaǵynyń ókilderi budan keıin kezdesýge qatysýshylardyń san alýan suraqtaryna jaýaptar qaıtardy. Aıtalyq, dúnıege jańa kelgen sábı­ge ek­pe jasaýdan bas tartqan ata-anany zań júzinde jaýapqa tartýǵa bola ma degen saýalǵa Aman­­jan Mákárim­uly: «Bul másele halyq­aralyq konvensııa nor­ma­larynan qashyq ketpeýi kerek. Al mun­daı jaǵ­daı­da zańǵa sáıkes sharalar qol­daný qajettigi qarastyrylmaǵan. Son­dyq­tan bul arada ata-analarmen júr­gizi­letin túsinik jumystaryna ba­sym­dyq berilýi kerek», – dep jaýap qaıtardy. Sondaı-aq, elimizde jeńil óner­kásiptiń damýy nege kenje qalyp otyr degen máselege Sapar­han Kesikbaıuly tarapynan: «Elimizde mundaı kidiris bar ekeni ras. Degenmen, respýblıka Úkimetinde belgilenip otyrǵan keıingi sharalar ony bir­shama retteýdi kózdeıdi. Bul baǵyt­ta shaǵyn jáne orta bıznes ókil­deri úshin birshama jeńildikter qaras­tyryl­ǵan. Eń bastysy, qazirgi kúni jeńil ónerkásip salasy bo­ıynsha shyǵarylatyn taýarlardy qaıtkende básekege qabiletti etýge bolady degen máseleler oılastyrylýda», – degen túıin jasady. Temir QUSAIYN, «Egemen Qazaqstan» AQTО́BE