Ár nárseniń parqy salystyrǵanda bilinedi. Mysaly, 2015 jyly Ispanııanyń Granada qalasynda ótken búkilálemdik qysqy stýdentter oıyndarynda bizdiń eldiń sportshylary 11 medal oljalaǵan bolatyn. Onyń beseýi altyn bolsa, altaýy kúmis edi. Endi mine, Qazaqstan quramasy óziniń bul kórsetkishinen úsh esedeı asyp tústi. Almatydaǵy Ýnıversıada alaýy sóngen kezde bizdiń qorjynymyzda 36 medal boldy. Altyn júldeniń ózi 11-ge jetti, kúmisten segiz medal alsaq, 17 ret qola júldeni qanaǵat ettik. Sóıtip, stýdent sportshylarymyz jalpykomandalyq esepte tek Reseı komandasyn ǵana alǵa jiberip, mártebeli ekinshi orynǵa tabandy nyq tiredi. Muny biz elimizdegi qysqy sporttyń qysyl-taıań shaqty artqa qaldyryp, qulash sermep damýdyń dańǵylyna túskeni dep uıǵardyq.
О́skemendikter órge súıredi
Almaty-2017 Ýnıversıadasynda eki myńnan astam atletter sporttyń 12 túri – bıatlon, shańǵy jáne konkımen júgirý, kerlıng, shańǵy jarys jáne qossaıys, shańǵymen tramplınnen sekirý, snoýbord, mánerlep syrǵanaý, frıstaıl, shaıbaly hokkeı jáne short-trek boıynsha 85 medal jıyntyǵyn sarapqa saldy. Bizdiń júldeli bolǵan sportshylarymyzdyń tabysyn óńirler turǵysynan alyp salystyra qaraıtyn bolsaq, Shyǵys Qazaqstan oblysy stýdentteriniń shoqtyǵy bıik tur. Mysaly, osy óńirdiń órenderi Qazaqstan qorjynyna 7 altyn, 2 kúmis jáne 2 qola medal saldy. Ásirese, 22 jastaǵy bıatlonshy Galına Vıshnevskaıanyń qol jetkizgen tabysyn aıryqsha atap ótýge bolady. Sportshy 7,5 shaqyrymdyq sprınterlik mass-start synynda jáne tórt atys shebi bar 12,5 shaqyrym qashyqtyqta aldyna jan salmady. Buǵan qosa ol 15 shaqyrymǵa sozylǵan jeke jarysta jáne komandalyq estafeta synynda kúmis júldege ıe boldy. Sondaı-aq, frıstaılshylar Dmıtrıı Reıhard pen Iýlııa Galysheva týraly da tek qana jyly lebiz bildirgen jón. Olar mogýl boıynsha ótken fınaldyq synda árqaısysy 70 balldan joǵary upaıǵa ıe boldy. Jas talant – nebári 19 jastaǵy shańǵyshy Ivan Lıýftiń de tamasha ónerin aıtpaı ketýge bolmaıdy. Ol sprınterlik qashyqtyqta aldyna jan salmaı, Qazaqstannyń júlde qoryna altynshy altyn medaldy qosqan edi. Budan bólek, bir ǵana Shyǵys Qazaqstan oblysynyń 19 hokkeıshisi Qazaqstan qurama komandasyna múshe bolyp, muz aıdynynda óner kórsetti. Mine, osy aıtylǵandardy saralaı kele, О́skemen óńirin qysqy sportymyzdyń qaınar kózi nemese chempıondardyń ustahanasy dep nyq senimmen aıtýǵa bolady.Eńbek etseń erinbeı...
Jeńiske jetken, júldeli bolǵan sportshylarymyz syı-sııapattan qur qalmaıdy. Mysaly, elimizdiń Mádenıet jáne sport mınıstri Arystanbek Muhamedıuly chempıondarymyzdyń 4,9 mıllıon teńgeden, kúmis júldegerlerdiń 3,3 mıllıon teńgeden jáne de qola medal ıegerleriniń 1,6 mıllıon teńgeden syıaqy alatynyn málimdedi. Bul – álemdik deńgeıdegi dodada el namysyn laıyqty qorǵaǵan erlerge degen shynaıy qurmet. Bile-bilsek, sportshylarymyzdy materıaldyq turǵydan osylaısha marapattaýdyń ózi bul saladaǵy jas býyndy bıik maqsattarǵa ári yntalandyryp, qulshyndyrary sózsiz. Jalpy, bizdiń sportshylar ishinde syıaqyny eń kóp alatyn – bıatlonshy Galına Vıshnevskaıa. Shyǵysqazaqstandyq shańǵyshy hám mergen qyz eki altyn jáne eki kúmis medaldary úshin 16 mıllıon 400 myń teńgeni jambasqa basady. Shańǵyshy Anna Shevchenkonyń da ámııany aqshaǵa syqaı tolmaqshy. Júırik shańǵysynyń arqasynda altyn, kúmis jáne qola júldelerdi jeńip alǵan jelaıaq sportshynyń mańdaı teri 13 mıllıon teńgege baǵalandy. Budan keıingi satyda frıstaıl sheberleri – Dmıtrıı Reıherd pen Iýlııa Galysheva. Olardyń árqaısysyna 9 mıllıon 800 myń teńgeden syıaqy beriledi.Qyr astynda – qysqy oıyndar
Sanaýly kúnderden keıin Sapporo qalasynda qysqy VIII qysqy Azııa oıyndary bastalady. Almatydaǵy aqjoltaı jeńister Japonııada jalǵasyn tapsa dep tileısiń. Degenmen, bizdiń qysqy sportshylar úshin eń basty doda – 2018 jyly Ońtústik Koreıanyń Phenchhan qalasynda ótetin HHIII qysqy Olımpııa oıyndary. Bul dúbirli dodaǵa qazaqstandyq sportshylar daıyndyqty bastap ta ketken syńaıly. «Biz úshin, – dedi Ulttyq Olımpıada komıtetiniń prezıdenti Tımýr Qulybaev. – Kelesi jyly bolatyn qysqy Olımpııa oıyndary. Ońtústik Koreıada ótetin bul dodaǵa qatysatyn sportshylarymyzdyń daıyndyǵy úshin óz tarapymyzdan qoldan kelgen jaǵdaıdyń bárin jasaımyz». Álbette, jaqyn kúnderi sportshylarymyzdyń Almaty-2017 Ýnıversıadasyndaǵy óneri jan-jaqty hám tereń taldaýdan ótetini sózsiz. Jetistikter óz aldyna, jiberilgen kemshilikter men qatelikter syn sadaǵyna ilinip, saralanatyny jáne ras. Saıyp kelgende, munyń bári de qyr astynda turǵan qysqy Azııa jáne kelesi jylǵy qysqy Olımpııa oıyndaryna degen muqııat daıyndyqtyń myqty irgetasy bolsa quba-qup.Ashy sabaq bolsa ıgi...
О́zimizde ótken Ýnıversıada synynda úmitti aqtamaǵan sportshylardyń bolǵany da ras. Ásirese, altyn júlde kútkende short-trek sheberleriniń synnan bir emes, birneshe márte súringeni kóńildi alań qyldy. Bar bolmysy ushqyrlyq pen ákkilikke qurylǵan bul sport túrindegi jaǵdaı jańylys basqan bir qadam, irkilip qalǵan bir sátke basybútin baılanǵan. Buǵan deıin kózge túsip, aýyzǵa iligip júrgen Abzal Ájiǵalıev, Nurbergen Jumaǵazıev, Nurtilek Qajyǵalıev, Aıdar Bekjanov jáne Denıs Nıkısha syndy sheberler úshin bul dodadaǵy san soqtyrǵan áttegenaılar ashy sabaq bolsa ıgi deımiz. Short-trekshilerimizdiń shalalaý óner kórsetkenin bas bapkerdiń ózi de moıyndady. «О́zim de shákirtterimnen altyn kúttim. Alaıda, jaǵdaı basqasha órbidi. Múmkin bolǵan 8 altynnyń altaýyn koreıalyqtar, ekeýin qytaılyqtar jeńip aldy. Olar myqtylyǵyn taǵy bir dáleldedi», degen edi «Egemen Qazaqstan» gazetiniń tilshisine bergen suhbatynda short-trekten el quramasynyń bas jattyqtyrýshysy Mádiǵalı Qarsybekov. Qalaı bolǵan kúnde de, búgin buıyrmaǵan altyn júlde Sapporo nemese Phenchhan muz aıdynynda aldymyzdan jarqyrap shyǵar degenge sengimiz-aq keledi. Múmkindiginen áldeqaıda tómen óner kórsetkender qatarynda jelaıaq konkıshilerimizdiń de bolǵany anyq. Ásirese, erler qurama komandasynyń kóshbasshysy Roman Kerchtiń kórsetkishi kóńil kónshitpedi. Qyzdar arasyndaǵy shashasyna shań juqtyrmaıdy degen jelaıaq konkıshimiz Ekaterına Aıdova da shaban júgirdi. Álbette, bul jerde aýa raıynyń qolaısyz bolyp, áıgili «Medeý» muzynyń ádettegideı jaltyrap jatpaǵanyn alǵa tartýǵa bolar. Degenmen, konkıshiler komandasyn órge súırep júrgen bul sportshylarǵa aldaǵy ýaqytta artylar jaýapkershiliktiń júgi tym aýyr bolmaǵyn aıta ketken jón. Frıstaıl-akrobatıka sportynyń sheberleri Baǵlan Ińkárbek, Janbota Aldabergenova jáne Jibek Arapbaevanyń da barynsha sátti óner kórsetýlerine bolýshy edi. Juptasyp sekirýdegi jalǵyz altyn júlde mundaı tájirıbeli sportshylar úshin azdyq etti degen oı da qylań beredi. Erler arasyndaǵy hokkeı quramasynyń aqyrǵy sátte altyn júldeden aıyrylyp qalǵany da biz úshin orny tolmas ókinish boldy. Al hokkeıshi qyzdarymyzdyń óneri tipti de syn kótermedi. Eńse tiktemese, bolmaıtyn túri bar. Degenmen, ýystan sýsyp ketken júldeni emes, ýystap alǵan medaldardy esepke alar bolsaq, osymen 28-shi ret alaý jaǵyp, jalaý jelbiretken Ýnıversıada qaı jaǵynan alyp qarasaq ta, Qazaq eli úshin qutty-qaıyrly boldy. Aldymyzdaǵy dodaly jarystarda da mereıimiz dál osylaı mártebeli bolsashy dep tiledik! Qaırat ÁBILDINOV, «Egemen Qazaqstan» ASTANA
