Memleket qonaq úılerdiń kommýnaldyq tólemin óteýge kómektesedi

QR Investısııalar jáne damý mınıstrligi energotıimdi tehnologııalardy engizý maqsatynda shıpajaılar men qonaqúılerdiń elektr energııa jáne kommýnaldyq shyǵyndaryn sýbsıdııalaýdy usynýda, dep habarlaıdyQazaqstannyń qonaqúıler jáne meıramhanalar qaýymdastyǵy. Iаǵnı, sýbsıdııa memleketten tegin berilmeıdi, ol úshin kásipkerler ózderiniń nysandarynda qazirgi zamanǵa saı elektrúnemdegish ınnovasııalyq tehnologııalardy engizýi shart. «Qaýymdastyqqa shıpajaılar men qonaqúılerdiń elektr energııasy, kommýnaldyq qyzmet shyǵyndarynyń bir bóligin sýbsıdııalaý týraly jáne qonaqúı men shıpajaı ıelerin energoaýdıt júrgizýge jáne energotıimdi tehnologııalardy engizýge yntalandyrý tetikterin jasaqtaý jóninde QR Investısııalar jáne damý mınıstrliginen hat keldi», - delingen qaýymdastyqtyń habarlamasynda. Sonymen qatar hatta QR Prezıdentiniń Ult josparyn oryndaý boıynsha «100 naqty qadam» baǵdarlamasynyń 57 qadamyna silteme jasalǵan. Onda qonaqúıler men shıpajaılardyń elektr energııasy men kommýnaldyq qyzmet shyǵyndaryn qarjylandyrý boıynsha tapsyrma berilgen bolatyn. QR IDM habarlaýynsha, Qazaqstanda osy baǵytta zańnama aıasynda kórsetilgen naqty tetikter bolmaǵandyqtan, sýbsıdııalaýdy júzege asyrý qıyndyqqa soǵýda. Mınıstrlik ókilderiniń atap kórsetkenindeı, eger memleket qonaq úıler men shıpajaılardyń kommýnaldyq jáne elektr energııasyna ketetin shyǵyndaryn tikeleı sýbsıdııalaıtyn bolsa, onda kásipkerlerdiń energııany tıimsiz paıdalanýyna ákep soqtyrýy yqtımal. Bul memlekettiń energoúnemdeý jáne energotıimdilikti arttyrý saıasatyna qaıshy keledi. «Soǵan baılanysty mınıstrlik atalmysh suraqty jetesine jetkizip, durys jolǵa qoıýdy josparlaýda. Balama retinde qonaqúı men shıpajaı ıelerin energoaýdıt júrgizýge jáne energotıimdi tehnologııalardy engizýge yntalandyrý tetikterin engizý jaıy talqylanýda», - delingen habarlamada.