Brendter básekesi

Ortalyq kommýnıkasııalar qyzmetinde «Halyq markasy» qazaqstandyq taýarlar men qyzmetterdiń sapasyn baqylaý júıesi federasııasy» zańdy tulǵalar birlestiginiń prezıdenti Rımma Tájibaevanyń qatysýymen baspasóz konferensııasy ótti. Ol óz sózinde otandyq ónimniń qazirgi ýaqytta qarqyndy damyp kele jatqanyn aıtty. «Astanada jaqynda ashylǵan «Halyq mar­kasy» saýda ortalyǵy qazaqstandyq ta­ýarmen tolyǵýda. Bir jerge ulttyq bren­dtik ónimder men taýarlar toptas­ty­rylýda. Olardy tutynýshylardyń qa­­ta­ry kún sanap artyp keledi. Ashyl­ǵa­­nyna birer aı ǵana bolǵan bul saýda ala­ńyndaǵy taýarlardyń barlyǵy otan­dyq óndirýshilerdiń qolynan shyqqan. Mun­­­daǵy taýarlar sheteldik ónimdermen teń túspese, kem túspeıdi. Taýarlar sapa­ly ári qoljetimdi. «Made in KZ» bel­gisi bar ulttyq brend búginde saýda na­ry­ǵyn­da óz ornyn oıyp turyp alýda», de­di R.Tájibaeva. Onyń aıtýynsha, keshe ǵana jastanatyn jastyqtan, jaıǵasqan jıhazǵa deıin shekaranyń ar jaǵynan jetkiziletin edi. Búgingi jaǵdaı bólek. Qazaqstandyq kásipkerler suranysty saralap, usy­nysty qabyldap, tutynýshyǵa sapasy joǵary, ári qoljetimdi baǵamen óz ónimin berýge ázir ekenin dáleldep otyr. Otandyq ónimniń basyn qosqan alańnyń artyqshylyǵy – satýshylar oryndy jal­ǵa alý úshin aqy tólemeıdi. Taýaryn te­gin qoıady. Qazirgi tańda mundaǵy taýar aına­ly­mynyń kólemi 30 mıllıon teńgeden as­ty. Búginge deıin bul pavılonda 100 shaq­ty kompanııa óz ornyn alyp, ony 10 myń­nan astam otandyq taýarmen toltyrdy. Jospar – otandyq brendti taýar túrin 500-ge jetkizý. Sonda pavılon 100 myńnan astam otandyq taýarǵa tolyǵatyn bolady. «Qazir biz EKSPO-2017 qarsańynda qala­nyń týrıstik kartasyna endik, óıt­keni, kelýshi qonaqtardyń bári, sonyń ishin­de sheteldik azamattar qazaqstandyq ónim­derdi izdeıtin bolady. Atlmysh kartaǵa tek otandyq ónimder satatyn saýda oryndary enedi. Oǵan deıin 7 Duty Free marketi ashylady», dedi Rımma Danabaıqyzy. R.Tájibaevanyń aıtýynsha, EKSPO­-2017­­ kórmesine oraı, «Qazaq­stan­­da ja­­­sal­ǵan» ulttyq brendterdi bas­qarý age­nt­­­tiginiń «Halyq markasy» 100 brendin ja­saý boıynsha jobasy iske asady. Oǵan ataqty ártister, sportshylar jáne depýtattar qatysady dep josparlaný­da. Jańa 100 qazaqstandyq brend azyq-túlik, jıhaz, úıge arnalǵan jabdyqtar, aıaq-kıim, kıim-keshek jáne taǵy basqa taýarlar toptamasy boıynsha ashylady. Sondaı-aq, baspasóz máslıhaty bary­synda Mańǵystaý oblysynyń qol­daýy­men, Olımpıadanyń eki dúrkin kúmis júl­­degeri Ádilbek Nııazymbetovtiń qur­­metine balalardyń «ZIBROO FOR ADOKA» sporttyq kıimderiniń tu­saý­keser-tanystyrý rásimi ótti. Suńǵat ÁLIPBAI, «Egemen Qazaqstan»