Lebizder legi
Georgıı KIM,
Parlament Senatynyń depýtaty:
– Búgin asa mańyzdy tarıhı qujat qabyldanyp otyr. Bul Deklarasııa elimizdiń búginge deıingi jetistikterin pash etip qana qoımaı, onyń aldaǵy kemel keleshegine taǵy bir nyq qadamyn aıqyndady. Qazaqstan halqy bir maqsat, bir múdde, bir bolashaq úshin qaı ýaqytta da tutastyq, turaqtylyq, tózimdilik kórsetip keledi. Halqymyz ótken jylǵy Qazaqstan Respýblıkasy Prezıdentiniń saılaýynda da, oǵan deıingilerinde de Elbasyn, onyń sarabdal saıasatyn, qazaqstandyq damý jolyn árqashan qoldaıtyndyǵyn kórsetip keledi. Bul joly da Deklarasııadaǵy usynystardy halqymyz qoldaıtynyna senimim zor.
Elbasynyń bastamasymen elordany Almatydan astanaǵa kóshirý elimizdiń geosaıası, áleýmettik-ekonomıkalyq, mádenı jáne rýhanı damýyna jańa betburystar ákelgenin bilemiz. Osynsha az ýaqyt ishinde Eýrazııa keńistiginde, Esildiń boıynda ásem qala boı kóterdi. Ult Kóshbasshysy irgetasyn qalaǵan, Astana elimizdiń, halqymyzdyń rýhyn asqaqtatty. Endeshe, osyndaı asqaq rýhty qalamyzdy Nursultan Nazarbaevtyń esimimen ataý El men Elbasynyń erligi bolady dep bilemin.
Saýytbek ABDRAHMANOV,
Parlament Májilisiniń depýtaty:
– «Baqyt baǵalaǵannyń basynda turady» – bir suhbatynda Elbasymyz osylaı degen bolatyn. Táýelsizdiktiń 25 jyldyǵynyń Deklarasııasy – basymyzdaǵy baqyttyń baǵasyn bilgizetin, eldiń, Elbasynyń eren eńbegin aıshyqty ashatyn asa qundy, shyn mánindegi tarıhı qujat. Onda bizdiń osy shırek ǵasyr ishinde ózgeler ǵasyrlar boıynda júrgen joldan ótkenimiz órnekti túrde, kórnekti túrde aıtylǵan.
Elbasy eńbegin tarazylaı otyryp, eńbegin el júreginde tańbalaý týraly kezinde óz maqalalarymda jazǵanmyn. 2008 jyly jaryq kórgen «Eńseli elorda» atty kitapta aıryqsha eńbegi, tarıhı úlesi bar uly tulǵalardy eldiń, jerdiń ataýlarynda aıshyqtaý dástúri baıaǵydan bar ekenine naqty mysaldar keltirgenmin. Keıbireýin ǵana eske salaıyn.
Adam atymen atalǵan tutas materık bar – Amerıka Amerıgo Vespýchchıdiń qurmetine atalǵan. Memleketter bar – Kolýmbııa Hrıstofor Kolýmbtyń, Bolıvııa Sımon Bolıvardyń qurmetine atalǵan. Teńizder bar – Barens teńizi, Berıng teńizi, Amýndsen teńizi, t.b. Buǵazdar bar – Berıng buǵazy, Magellan buǵazy, t.b. Araldar da az emes. Múıister de jetkilikti. Qalalar jóninde aıtyp jatýdyń ózi artyq. Astanalardan bireýin ǵana ataıyn. Demokratııa dástúrleri damyǵan Amerıka Qurama Shtattarynyń astanasy Vashıngton eldiń tuńǵysh prezıdenti Djordj Vashıngtonnyń atymen atalǵan.
Jópeldemede aýyzǵa túsken osy mysaldardyń ózi álemde asa iri tarıhı tulǵalardyń esimin aıryqsha ardaqtaý dástúri ejelden ornyqqanyn kórsetedi.
Máýlen Áshimbaev,
Parlament Májilisiniń depýtaty:
– Bizdiń elimizdiń bıik maqsattardy baǵyndyrý jolynda ári Memleket basshysynyń Qazaqstannyń damý tarıhyndaǵy aıryqsha kóshbasshylyq qasıetin qoǵam arasynda nyǵaıta túsý maqsatynda depýtattarymyz búgin birqatar usynystardy talqylaý ústinde. Bul rette óz áriptesterimniń Astana ataýy men keıbir mańyzy zor nysandarymyzdy Elbasy atyna laıyq dep tanyp, talqylap jatýy durys jáne óte oryndy dep oılaımyn. Al endi ol qalaı iske asyrylady, ony el-jurtpen aqyldasyp, keńese kele tıimdi sheshim qabyldaımyz dep sanaımyn.
Baqytbek SMAǴUL,
Parlament Májilisiniń depýtaty:
– Túrki dúnıesiniń aqsaqaly Elbasynyń esimimen elordany ataý – óte oryndy bastama. Búkil demokratııasy álemge áıgili AQSh-ta da eń birinshi osy eldiń irgesin qalaǵan Vashıngtonnyń atymen qala atalatyny belgili. Biz táýelsiz sana qalyptastyrý úshin, elimizdiń geografııalyq turǵan ornymyzdyń ereksheligine, qıyndyǵyna baılanysty, halyqtyń azattyqqa degen babalar armanyn, amanatyn arqalaýy turǵysynda osy másele Qazaq eli úshin óte mańyzdy. Sondyqtan da óziniń terin tókken, eldiń dańqyn álemdik deńgeıge kótergen, eldiń yqylasyna kenelgen, parasatty, Túrki dúnıesiniń aqsaqaly atanǵan, alysty jaqyndatyp, arazdy dostastyrǵan Elbasymyzdyń esimi Qazaqstan halqy úshin erekshe. Osy oraıda belesten beleske kóterilý úshin «Máńgilik El» jolynda Táýelsiz Qazaqstannyń elordasy Elbasymyzdyń atymen atalyp jatsa, bul óte laıyqty bastama. Eldiń armanyn aıalaǵan, óziniń eńbegin elinen aıamaǵan Elbasynyń esimin halyq laıyqty dárejede ustaýy tıis.
Zaǵıpa Balıeva,
Parlament Májilisiniń depýtaty:
– Biz keıbir memleketter júz jylda jetken jetistikterge bas-aıaǵy jıyrma bes jylda jettik. Elimizdi osyndaı beleske shyǵarǵan bizdiń Prezıdentimizdeı tulǵa kez kelgen elde kezdese bermeıdi. Onyń ústine, prezıdentter esimi berilgen astanalar da joq emes. О́z basym Astanany Elbasynyń esimimen ataýdy quptaımyn. Daýysqa salatyn bolsa, qoldaımyn. О́ıtkeni, bizdiń Astanamyz – álemdegi eń jas astanalardyń biri. Bul jerde myńdaǵan sábı dúnıe esigin ashyp, ósip-ónip jatyr. Shırek ǵasyrda halqymyzdyń týý kórsetkishi 60 paıyzǵa artyp, memleketimiz gúldeı jaınap kórkeıip keledi. Qaı jerde senim men súıispenshilik, meıir-mahabbat jáne turaqtylyqqa bólengen túzý turmystyq-áleýmettik jaǵdaı bolsa, sol jerde sábıler kóptep dúnıege keledi. Bizdiń elordamyzda osynyń bári bolǵandyqtan, oǵan Elbasymyz zor eńbek sińirdi. Sondyqtan da Ult Kóshbasshysy retinde qandaı qurmetke bolsa da laıyq.
Pavel Kazansev,
Parlament Májilisiniń depýtaty:
– Qazaqstan Respýblıkasynyń memlekettik qurylymy zamanaýı demokratııalyq qundylyqtarǵa negizdelgen. Bizdiń Prezıdentimizdiń bul qujatqa veto qoıyp, keri qaıtarýǵa da quqy bar. Iаǵnı, mundaı bastamany Parlament qabyldaǵanymen, ony tolyqtyryp, túzetý úshin nemese keri qaıtarý úshin qujatqa qol qoıatyn Prezıdent. Bul demokratııalyq prınsıpterge saı keledi jáne is qalaı jalǵasyn tabatynyn ýaqyt kórsetedi. Al qazir Parlamentimiz óziniń ıdeologııalyq úni men saıası kózqarasyn qoǵamǵa bildirdi. Árıne, jetildiretin tustar men birqatar usynystar bar. Ony otandastarymyz is barysynda talqylaı túsetin bolady.
Sýretterdi túsirgen
Erlan OMAROV,
«Egemen Qazaqstan»
