Bárekeldi! Belgili bıatlonshy Dıas Keneshev Vankýverde ótetin Aq Olımpıadanyń ashylý saltanatynda Qazaq eli týyn ustaý qurmetine ıe boldy.
Jıyrma tórt jastaǵy ol burnaǵy jyly ótken bıatlonnan jazǵy álem chempıonatynyń jeńimpazy jáne kúmis pen qola júldeniń ıegeri. El kýbogy men chempıonattarynyń da birneshe dúrkin jeńimpazy men júldegeri bolyp tabylady. Demek, Dıas – el týyn senip tapsyrýǵa laıyqty azamat. Tý ustaý – ár sportshynyń armany. Aq Olımpıadanyń sońǵy on jyldyǵyna kóz júgirtsek, Qazaqstan týyn 1994 jyly serippeden shańǵymen sekirýdiń sheberi Qaırat Bıkenov ustapty. 1998 jyly el baıraǵyn Olımpıada chempıony, sondaı-aq Olımpııa oıyndarynyń tórt ret kúmis jáne eki ret qola medaliniń ıegeri, tórt dúrkin álem chempıony, burynǵy KSRO-nyń birneshe dúrkin chempıony bolǵan shańǵyshy Vladımır Smırnov alyp júrdi. Osy arada V.Smırnovtyń Qazaq eline aq Olımpıadanyń altynyn ápergen jalǵyz sportshy ekenin aıta keteıik. 2002 jyly bul mártebege konkıshi Radık Bıkchentaev, al 2006 jyly hokkeıshi Aleksandr Koreshkov ıe boldy. Bir qyzyǵy, tý ustaý qurmeti keıbir sportshylarǵa arman bolsa, endi bir ataqty sportshylar odan óz ótinishterimen bas tartatyn jaǵdaılar da joq emes. Sońǵylary óz sheshimderin Olımpıadanyń ashylýy men jabylýy kezindegi uzaqqa sozylatyn saltanatta saǵattap turý men júrip ótetin joldyń júıkege salmaq túsirer qashyqtyǵymen túsindirgisi keledi. О́ıtkeni, bul sol kúni nemese ertesine synǵa túsem dep otyrǵan sportshynyń kóńil-kúıi men babyna keri áser etýi múmkin. Bizdińshe, sportshynyń aldynda qandaı aýyr syn kútip tursa da tý ustaý qurmetinen bas tartýǵa bolmaıtyn sııaqty. О́ıtkeni, Keńes ókimetiniń tusynda bul qurmet qazaqstandyq sportshylardyń úsh uıyqtasa da túsine kirmeıtin arman bolatyn. Sıdneı Olımpıadasynda Jambyl óńirinen shyqqan talantty boksshy Ermahan Ybyraıymov qazaqtyń Tuńǵysh Prezıdenti Nursultan Nazarbaev senip tapsyrǵan el týyn joǵary kóterip shyqty. Sol joly ol Elbasyna bergen ýádesinde turyp, Olımpıada chempıony atandy. Eldiń ıesi bolsa, týdyń kıesi bar. Mysaly, Reseıdiń ataqty balýany, álemniń birneshe dúrkin chempıony, Seýl (1988 j.), Barselona (1992 j.) jáne Atlanta (1996 j.) Olımpıadalarynyń chempıony Aleksandr Karelın óziniń Sıdneı Olımpıadasyndaǵy kúmis medaldy qanaǵat tutqan “sátsizdiginiń” bir sebebin tý ustap shyqpaýynan kóredi eken. О́ıtkeni, ol munyń aldyndaǵy eki Olımpıada saltanaty kezinde álem jurtshylyǵyna Reseı sportshylarynyń myzǵymas tý ustaýshysy retinde tanylǵan bolatyn. Sportshylardyń kóbisiniń Qudaıǵa qulshylyq jasap, yrymǵa senetinin eskersek, tý ustaý sııaqty ekiniń biriniń qoly jete bermeıtin baqytty basqa tebýge bolmaıtyn sııaqty. Sondyqtan Qazaqstannyń týy senip tapsyrylǵan sport sheberi Dıas Keneshev pen sol qasıetti kók baıraqtyń astynda jarys joly men muz aıdynyna shyǵatyn qazaqstandyq muzbalaqtarǵa tek sáttilik tileıik. Kósemáli SÁTTIBAIULY.
