Lara Fabıan
Lara Fabıan degende fransýz tilindegi ataqty Je t’aime ániniń syńsyp jetken melodııasy qulaǵymyzǵa kele qalatyny bar. Estradalyq regıstrdiń joǵarǵy notalarynda shyrqaı alatyny úshin Lara Fabıannyń daýysyn synshylar «lırıkalyq sopranonyń etalony» dep baǵalaıdy.
Ol 1970 jyly Brıýsseldiń shetindegi Etterbek aýdanynda dúnıege keldi. Qyzynyń talantyn baıqaǵan ákesi 8 jasqa tolǵanda pıanıno satyp alyp beredi. Ary qaraı oqýyn Brıýssel konservatorııasynda jalǵastyrady. Laranyń ákesi de ónerden qara jaıaý emes edi, gıtarıst bolǵan ol qyzyn ertip alyp, ártúrli mýzyka klýbtarynda óner kórsetip júrdi. Osy tustarda Lara «Tramplın» («Tremplin de la chanson») konkýrsyna qatysyp, júldeli orynǵa ıe boldy. Túnde uıyqtap, tańerteń turǵanda álemge áıgili tulǵa bolyp oıaný ertegige bergisiz shyndyq eken. 1988 jyly Lıýksembýrgta ótken «Evrovision-88» baıqaýyna qatysýy ánshige bir kúnde ataq pen abyroı ákeldi. 18 jastaǵy boıjetkenniń oryndaýyndaǵy «Croire» áni halyq arasynda lezde hıtke aınalyp, Eýropada 600 myńnan astam ekzemplıarmen taralyp, nemis, aǵylshyn tilderine aýdaryldy. Osydan keıin-aq óneri órge júzip, «L’Aziza est en pleurs», «Je sais» atty albomdaryn jazyp, «Pure» atty úshinshi albomyn Kanadada 1996 jyly jaryqqa shyǵardy. Osydan keıin-aq, nebir televızııalyq shoý baǵdarlamalardyń qonaǵy bolyp, fransýzdyq bedeldi jýrnaldyń bas betinde jarqyrady.
Úzdik vokalıst jáne úzdik jandy daýystaǵy konsert boıynsha Felix Awards syılyǵyn (1995), jyldyń pop-albomy (1997), Felix Award syılyǵyna (1998), «Úzdik ártis» atylymy boıynsha Benılıýks halyqaralyq mýzyka premııasyna (2001) ıe boldy. Ánshi óziniń feısbýk áleýmetik jelisindegi jazbalarynyń birinde 2018 jyly Lara Fabıan atty halyqaralyq týr Soltústik Amerıkada ótetini týraly aıtqan. 2017 jyly kúzde shyǵatyn «Camouflage» jınaǵy sońǵy onjyldyqtaǵy aǵylshyn tilindegi alǵashqy albomy bolmaq.
Eva Longorııa
Al Fransııanyń astanasynda ótken Global Gift Gala qaıyrymdylyq keshinde Dımashty bıge shaqyryp júrgen Eva Longorııa amerıkalyq kıno aktrısa, model. Qazaqstandyq jurtshylyqqa «Otchaıannyh domohozıaek» serııalyndaǵy Gebrıel Solıs rólimen etene tanys bolatyn. Ol 1975 jyly AQSh-tyń Tehas shtatynda dúnıege kelgen. Otbasyndaǵy bes qyzdyń ishindegi sút kenjesi Eva Longorııa ǵana Tehas ýnıversıtetine oqýǵa túsedi. Kınezıologııa salasynda oqyp júrip, ol bos ýaqytynda stýdenttik teatrda óner kórsetedi. 1988 jyly naýryzda Korpýs Krıstı sán konkýrsynda bas júldege ıe bolyp, Los-Andjeleste ótetin talanttar shoýyna joldama alyp, baǵy janady. Osydan soń ol akterlyq karerasyn shyńdaý maqsatynda Kalıfornııada qalýdy jón kóredi.
Akterlyq karerasy týraly aıtatyn bolsaq, 2000 jyly Longorııa «Beverlı Hıllz 90210» fılminde jylt etip kórinip qalatyn tusy bar. Kelesi jyly jas aktrısa «The Young and the Restless» serıalynda jyndy Izabellanyń rólinde oınaıdy. Bul eńbegi úshin 2002 jyly American Latino Media Arts (ALMA) syılyǵyna ıe bolady. Budan keıin «Otchaıannye domohozıaıkı» (ABC Desperate Housewives) serııalyndaǵy jańa róli ony jalpyhalyqtyq tanymaldylyqqa ıe etip, kelesi jyly «Teen Choice Awards» konkýrsynda arnaıy júlde aldy. Sonymen birge 2005 jyly 50 eń ádemi adamdar tiziminde esimi ataldy. Bir ǵana serııaldaǵy ról sáttilikke jol ashyp, «Harsh Times» (2005, Krıstıan Beıl), The Sentinel (2006, Maıkl Dýglas) pen The Heartbreak Kid (2007, Ben Stıller) fılmderine tústi. 2006 jyly «Úzdik komedııa aktrısasy» nomınasııasy boıynsha «Altyn globýs» premııasyna ıe boldy. 2017 jyly Rıkardo de Monreıldiń rejısserligimen túsirilgen lowriders dramasynda basty rólderdiń birin somdady.
Ol kıno ónerinen tys qaıyrymdylyqpen aınalysady. Naqtyraq aıtqanda, Padres Contra el Cancer ulttyq kommersııalyq emes uıymynyń basqarýshysy. Birneshe jyldan beri qaterli isik dertine shaldyqqan latynamerıkalyq balalarǵa qaıyrymdylyq kórsetýmen jáne ózge de halyqaralyq mańyzy bar qaıyrymdylyq sharalaryna belsene aralysyp keledi.
Aıa О́mirtaı,
«Egemen Qazaqstan»
