Monýmenttiń jóndeýden keıin qalaı ózgeretinin jáne meımandardy nesimen tańǵaldyratyny týraly Astana ákimdiginiń medıa ortalyǵynyń tilshisine bergen suhbatynda mádenıet oshaǵynyń jóndeý jumysymen aınalysatyn kompanııa ókili Baýyrjan Saǵdıev baıandap berdi.
- Bul nysan tutas qalanyń sımvoly bolǵandyqtan qyzyqty. Ári dızaınerlik sheshimi de erekshe. Sondyqtan dızaınerlerdiń ıdeıasyn tolyq júzege asyrýǵa tyrystyq. Joba dızaınyna sáıkes nysan 95 paıyzǵa daıyn. Jalpy, monýmenttiń kúrdeli jóndeý jumysy 10 maýsymǵa deıin aıaqtalady, - dedi B.Saǵdıev.
Elimizdiń basty sımvolynyń kúrdeli jóńdeý jumysy bıylǵy jyldyń basynda bastaldy. Jıyrma jylǵa jýyq ýaqyt ishinde jóndeý kórmegen nysannyń estetıkalyq kelbeti kómiskilenip ketti. Budan bylaı kelýshiler nysannyń kúmbezinen jańa kórinisti tamashalaı alady.
- Biz jeldetkish, aýa ótkizgish, santehnıkanyń barlyǵyn jańasyna aýystyrdyq. Aýa baptaǵyshtary bar. Dızaıner stıli men mazmunyn ózgertti. О́zgeristi nysannyń ishinen ǵana emes, qasbetinen-aq baıqaýǵa bolady, - dedi ol.
Kúrdeli jóndeýge baılanysty monýment jumysy tolyǵymen toqtatyldy. Nysannyń tústik úılesimi – aq jáne altyn reńkti bolyp qaldy. Jóńdeýge 100-ge jýyq adam jumyldyrylǵan. Nysandaǵy tozyǵy jetken ári shytynaǵan shynypaketteri jańasyna aýystyryldy. Italııalyq tehnologııamen ázirlengen shyny vıtrajdary qaqaǵan aıaz ben aptap ystyqqa shydap uzaq qyzmet etýi tıis.
«Barlyǵyn almastyrdyq. Kúrdeli jumys isteldi. Shyny paketteri Italııada jasalǵan. О́te sapaly. Ol altyndanǵan, sırek kezdesetin shyny», - dedi merdiger kompanııanyń ókili.
Jobaǵa sáıkes, 18 shyny paketi aýystyryldy. Sonymen birge jedelsaty shahtasy baǵandarynyń shyny paketterin aýystyrýdyń keshendi sharalary júzege asyryldy. Jylý shyǵynyn azaıtý úshin energııa únemdeıtin eki qabatty shynypaketter ornatyldy. Oǵan qosa shynyny shytynaýdan saqtap joǵary temperatýrada jumys isteıtin arnaıy qurylymdy sılıkondy qymtaqtar paıdalanyldy.
- Shynylardyń arasy jylýdy saqtap turatyn arnaıy gazben toltyrylǵan. Ǵımarattyń ishine kúrdeli jóndeýden góri árleý jumystary kóp júrgizildi. Iаǵnı, eden tósemin mármárdan tósedik. Tóbesi aýyr keskindemeden turady, aǵash, MDF jáne kópdeńgeıli tósemder paıdalanyldy, - dedi ol.
