Oqıǵa 18 qańtar kúni Shyǵys Qazaqstan oblysy Altaı aýdanyna qarasty Solovıovo aýylynda bolǵan. О́z úıiniń aýlasynda sharýashylyq jumystarymen aınalysyp júrgen Rýlan Seıitov Kopylov kóshesindegi kórshisiniń úıiniń shatyrynan tútin shyǵyp jatqanyn baıqaıdy. Ol birden kómekke umtylǵan.
«Úıdiń kireberis esigin ashýǵa árekettengenimen, ishi qoıý tútinge tolýyna baılanysty ǵımaratqa kirý múmkin bolmaǵan. Osydan keıin Rýlan Seıitov úıdi aınalyp ótip, ekinshi jaǵynan synǵan terezeni kóredi. Tereze mańynda kómekke muqtaj eki balany baıqap, olardy tútinge toly úıden tereze arqyly syrtqa, taza aýaǵa alyp shyǵady. Daladaǵy aýa temperatýrasynyń tómen bolýyna baılanysty balalardy óz úıine aparyp, jyly jaǵdaımen qamtamasyz etken», delingen habarlamada.
Aıta keteıik, erlik kórsetken Rýlan Seıitov Solovıovo orta mektebinde muǵalim bolyp jumys isteıdi.
