Kesh barysynda Nurhan Ahmetbekov atyndaǵy mádenıet úıiniń janyndaǵy «Mirdiń oǵy» ázil-syqaq otaýynyń ónerpazdary Seıit Kenjeahmetulynyń ıntermedııalaryn sahnalady. Al satıra sardary urpaqtarynyń atynan Svetlana Seıitqyzy áke jaıynda tolǵana sóılep, kóńil eljireter saǵynyshty estelikter aıtty.
Is-shara aıasynda «San ónerdiń sarbazy» atty kórme ashylyp, kópshilik qalamgerdiń kózi tirisinde ózi tutynǵan kezdigin, qaǵaz kesetin pyshaǵyn, radıoqabyldaǵyshyn, oıýly kesesin, kórgende kózge ottaı basylatyn aq qalpaǵyn, dombyrasyn, ózge de jeke dúnıelerin tamashalady.
«Seıit Kenjeahmetuly – tek satırık jazýshy, etnograf ǵalym ǵana emes, keshegi ózi kózin kórgen Nurhan, Ahmethandardyń jolyn jalǵap, aıtysqa da qatysqan sýyryp salma aqyn. Mysaly, 1967 jyly Qostanaı qalasynyń atynan aıtysqa shyǵyp, Rýdnyı qalasynyń aqyny Nazıqa Erǵalıevamen sóz qaǵystyrǵan. Seıit aǵa óziniń halqyn, onyń ádet-ǵurpyn, dástúrin, mádenıetin súıdi. Qalamger «Torǵaı tańy» gazetinde qyzmet etip júrgende sol kezdegi partııanyń ıdeologııa jónindegi hatshysy О́zbekáli Jánibekov shaqyryp alyp: «Sen satırany jaza beresiń ǵoı, biraq myna qazaqtyń umytylyp bara jatqan ádet-ǵuryp, salt-dástúrin kim jınaıdy? Osy sharýany qolǵa alsań, qaıtedi?», degen usynys aıtady. Osylaısha, Seıit aǵamyz jyldar boıy talmaı izdenip, ultymyzdyń salt-sanasy, dástúr-mádenıeti týraly qazaq, orys, aǵylshyn tilderinde úsh tomdyq kitap shyǵaryp ketti», deıdi Arqalyqtaǵy Dala ólkesi tarıhy mýzeıi dırektorynyń orynbasary Batyrlan Saǵyntaev.
Qostanaı oblysy
