Atap aıtqanda, Memleket basshysyna Ońtústik Koreıa Elshisi Kım De Sık, Indonezııa Elshisi Rahmat Pramono, Rýmynııa Elshisi Chezar-Manole Armıaný, Serbııa Elshisi Vladan Matıch senim gramotasyn tabys etti.
Osydan keıin Qazaqstan Prezıdenti Elshilerdi joǵary mártebeli qyzmetke taǵaıyndalýlarymen quttyqtady.
«Bul sizderdiń dıplomatııa salasyndaǵy jetken úlken shyńdaryńyz bolyp sanalady. Biz Táýelsizdiktiń 25 jyldyǵyn jańa ǵana atap ótken elmiz, jas memlketpiz. Osy jyldardyń ishinde kóp qıynshylyqtan ótip, eshkim bilmeıtin Qazaqstandy dúnıejúziniń kartasyna engizdik. О́sip, órkendep kele jatqan elderdiń qataryna qostyq. Budan keıin biz jańarýdyń, órleýdiń ekinshi kezeńine tústik. Sondyqtan men Qazaqstannyń úshinshi jańǵyrýy atty jańa baǵdarlamany jarııaladym. Ekinshiden, elimizdiń ındýstrııalyq baǵdarlamasy qarqyndy júzege asyp jatyr. Biz kenge baı elimiz. Degenmen, alternatıvti ekonomıka jasaý úshin jańadan ındýstrııa qurýdamyz. Úshinshiden, rýhanı jańǵyrý aıasynda jastardy zaman talabyna saı tárbıeleýdi júzege asyrýdamyz», - dedi Qazaqstan Prezıdenti.
Sonymen qatar Memleket basshysy osy aıtylǵan bastamalardyń basty baǵyty damyǵan 30 eldiń qataryna qosylý ekendigin basa aıtty.
