Qazaqstan qoı etiniń eksportyn 2021 jylǵa qaraı 50 esege arttyrýdy josparlap otyr, dep habarlaıdy QazAqparat.
«Indıkatıvti málimetter boıynsha, 2021 jylǵa qaraı Qazaqstanda qoı etiniń eksporty 10 myń tonnaǵa jetedi. 2016 jyly Qazaqstan jalpy 191 tonna qoı etin shetelge jóneltken. Qazir biz jyl saıyn 150 myń tonna qoı etin óndiremiz. Ishki tutyný kólemi - shamamen 111 myń tonna. Biz ózimizdiń qajettiligimizdi 130-140 prosentke ótep kelemiz. Iаǵnı, ishki naryqqa qajetti normadan 30-40 myń tonnaǵa kóp shyǵaramyz. Bizge ishki naryqqa nuqsan keltirmeı-aq 30-40 myń tonna qoı etin syrtqa eksporttaýǵa bolady», - dedi vıse-mınıstr baspasóz máslıhatynda.
Onyń aıtýynsha, qazir Qazaqstan qoı etin Iranǵa tasymaldaýǵa múmkindik aldy. Sebebi Iranmen birlesken veterınarlyq sertıfıkattar jasaldy. Arab Ámirlikterine de jol ashyq, qazir Izraıl tarapymen de kelissózder júrgizilde.
T. Rahymbekovtiń sózine qaraǵanda, Qytaı tarapy Qazaqstannan qoı etin alýǵa múddeli. Sebebi jyl sanap qytaılyqtardyń azyq-túlikke degen suranysy artqan, ishki ónimderdiń kólemi jetkiliksiz. Osy maqsatta sáýir aıynyń sońynda Qytaıdan kelgen arnaıy ınspeksııalyq top Qytaı naryǵy úshin jabyq Qazaqstannyń bes oblysyna tekseris júrgizgen. Endi maýsym aıynda túbegeıli sheshim shyǵarylsa, atalmysh oblystardan et tasymaldaýǵa jol ashylady.
«Qazaqstan Qytaıdyń azyq-túlikke degen suranysyn qamtamasyz ete alady dep aıtý qıyn. Qytaıda ómir sapasy artqan saıyn tamaqtaný mádenıeti de ózgerip jatyr. Buryn ózderińiz bilesizder, Qytaı halqy nandy óte az tutyndy. Eger qazir árbir qytaılyq kúnine bir tilim nan jeıtin bolsa, Qytaıǵa jylyna 25 mln tonna bıdaı qajet bolady. Al Qazaqstan jalpy 20 mln tonna ǵana astyq jınaıdy», - dep atap ótti ol.
