Málimetinshe, kendiler shaharynda halyqtyń ortasha ómir súrý uzaqtyǵy 67 jastan 70 jasqa joǵarylaǵan. Sáıkesinshe, náresteler ólim-jitim kórsetkishi 1000 balaǵa shaqqanda 17,1%-dan 4,6%-ǵa tómendese, jalpy ólim-jitim kórsetkishi 1000 adamǵa shaqqanda 7,1%-dan 1,6 %-ǵa azaıǵan. Sondaı-aq, týberkýlez dertimen syrqattanýshylyq 1000 adamǵa shaqqanda 85%-dan 27%-ge tómendep, qan aınalym júıesinen bolǵan ólim-jitim kórsetkishi 1000 adamǵa shaqqanda 137,2%-dan 10,7%-ge, onkologııalyq aýrýdan bolǵan ólim-jitim kórsetkishi 1000 adamǵa shaqqanda 35,8%-dan 15%-ǵa kemipti.
Qala ákimi, sonymen birge, shahardyń áleýmettik-ekonomıkalyq damýyna áser eter ınvestısııa, taý-ken óndirisi, ónerkásip, aýyl sharýashylyǵy, kommýnaldy sharýashylyq syndy birqatar salalardaǵy jetistikterdi baıan etti.
«Kentaýdaǵy ındýstrıaldy aımaqta ınfraqurylym júıeleri tolyǵymen júrgizilip, jalpy quny 1998,5 mln.teńgege 5 joba ornalastyryldy. Onyń búginge deıin ekeýi iske qosylsa, qalǵan 3 joba - «Asfalt-beton qospasyn óńdeý zaýyt qurylysy», «Kıslorod shyǵarýdy uıymdastyrý» jobasy jáne «Medısınalyq buıymdar shyǵarý» jobasy jyl sońyna deıin iske qosylatyn bolady», - dedi shahar basshysy.
Á.Maqulbaev sondaı-aq, Kentaý halqynyń aýyz sýmen qamtylyp, tabıǵı gazǵa qol jetkizý jolynda atqarylyp jatqan birqatar jumystardy aıtyp berdi. Kóriktendirý, kógaldandyrý jáne abattandyrý jumystary da barshylyq. Jalpy, qala boıynsha 25,9 ga jerge 19150 kóshetter otyrǵyzylsa, aǵymdaǵy jyly S.Qojanov saıabaǵyna kúrdeli jóndeý, Qonaev, Abaı dańǵyldary, Kalenov kóshesi jáne «Jastar ortalyǵy» alleıalarynyń abattandyrý jumystary bastaldy.
