Umytylmas kún polıseı erliginiń kýásine aınaldy

Túngi saǵat 04.00 shamasynda shyrt uıqyda jatqan Erlannyń jelisiz telefonyna bireý qońy­raý shaldy. Qus uıqyly ýchaskelik ınspektor jary, balalary oıanyp ketpesin dep, telefonyn jedel alyp, túımesin basa qoıdy. Ar jaqtan «Stepnaıa kóshesindegi 5-úıde turatyn Iýlııa Golovkomyn, biz­­diń úıge tez jetińiz», dep sy­byr­laǵan qyzdyń aptyqqan daý­­ysy estildi. Dabyldy telefon qońyraýynyń tegin emes eke­nin sezdi. Kóz ilespes shap­shańdyqpen kıindi de, dereý «Nıva» mashınasymen on mınýtqa jetpeıtin ýaqytta álgi úıdiń mańaıyna jetip keldi. Biraq dál Golovkolardyń úıine toqtamaı, oǵan jetpeı, araǵa eki úı salyp toqtady. Tańǵy uıqynyń kezi ǵoı, aýyl typ-tynysh, ıtter de úrmeıdi. Golovkolardyń úıine keldi, dálizdiń shamy janyp tur, qalǵany sóndirýli. Polısııa kapıtany formada bolatyn, biraq tapanshasyn tastap ketipti. Ishteı «áttegen-aı!» dedi, biraq sheginerge jol, táýekelden basqa amal joq. Esikti ashyp, úıge kirdi, terezeden tańnyń bozǵyltym jaryǵy túsken áli qarakóleńke tór bólmeden ári qarap turǵan er adamnyń sulbasyn kórdi. 
− Er adamnyń oń qolynda pyshaq bar ekenin baıqap qaldym, jerde baılanyp jatqan eki áıel­diń ústine tónip tur, − deıdi E.Tańjaryqov. – Oılanyp turýǵa ýaqyt tyǵyz. 
Ol áskerı sambo kú­resiniń ádis­­terine saldy da, qyl­mys­ker­diń qolynan py­sha­ǵyn ushy­ryp jiberip, qolyn qaı­y­ryp, tyrp etkizbeı turyp, aýdan or­ta­lyǵynan kómekshi kúsh sha­qyr­dy. Jedel-tergeý toby kel­gen­she ýchaskelik ıns­pektor qa­raq­shy­nyń Rýdnyı qalasynyń 21 jas­taǵy turǵynynyń, pro­ba­sııa­­lyq baqylaýda esepte tur­ǵa­nyn anyqtap ta qoıdy. Ol túrmeden jaqynda ǵana shy­ǵyp kelgen, buryn da osyndaı qaraq­shylyǵy úshin sottalǵan azamat eken. Golovkolardyń úıinde apaly-sińli eki áıel, qyzy já­ne tósek tartyp jatyp qalǵan 
qa­rt anasy ǵana turatyn. Úıde er adam­nyń joqtyǵyn paı­­dalanyp, áıelderden aqsha talap etken. Oıy buzyq adam úı­ge kirgende, qyzy Iýlııa aǵash tó­sektiń astyna tyǵylyp úlgeripti. 
Osy joly Iýlııanyń úıine jasalǵan qaraqshylyqty ýchas­kelik ınspektorǵa habarlaǵan erliginiń ózi Erlannyń tur­ǵyndarmen júrgizgen tynymsyz jumysynyń nátıjesi deý­ge bolar. Kalının aýyldyq ok­rýginde jergilikti polıseıdi turǵyndardyń barlyǵy biledi. Ol okrýgke qarasty eldi meken­derdi erinbeı aralap, olarǵa tártip saqtaý týraly túsinik ju­mys­taryn júrgizip, keterinde aty-jóni, telefon nómiri ja­zylǵan vızıtkalyq kartochkasyn beretin. «Eger kútpegen oqıǵa bolǵan jaǵdaıda kún-tún demeı maǵan habarlasyńyzdar», deıtin. Iýlııa mektep oqýshysy bolsa da zerektikpen onyń telefon nó­mi­rin óziniń telefonyna tirkep qoıǵan eken. Sonyń arqasynda, qaraqshynyń qandy sheńgelinen bir úıli jan aman qaldy. 
Sol kúni túndegi bórigýden endi bosap otyra bergende, Taran aýdandyq ishki ister bóliminen jedel aqparat tústi. Tańjaryqovqa balyqshylardy qutqarý isi jedel tapsyryldy. Ol Qaratomarǵa shuǵyl jetkende «VAZ-2113» markaly mashınasy muzdyń ortasynda tur eken. Kóktemge salym muzdyń juqaryp qalǵan kezi, muz ústinde kólikpen túgil, jaıaý júrýdiń ózi asa saqtyqty qajet etip qalǵan kez. Erli-zaıypty balyqshylar mashınasyn muzdan shyǵara almaı tur eken. Ýchaskelik ınspektor ony óziniń qyzmet mashınasyna arqanmen baılap, jaǵaǵa tartyp shyǵardy. Aıaq-qoldary úsip ketýge sál qalǵan balyqshylardy Rýd­nyı qalasyna deıin aparyp saldy. 
− Bizdiń Beregovoe aýyly Qa­ratomar sý qoımasyna ja­qyn ornalasqan. Jyl boıy oǵan balyqshylar keledi. Eger biz kirispegende tal túste balyq­shylar sý ústinde qatyp qalatyn eken, − deıdi E.Tań­jaryqov. Kábısa jyly ol osylaı eki otbasyn ajaldan aman alyp qaldy. Sol oqıǵalardan keıin turǵyndar ýchaskelik ınspektorǵa alǵysyn aıtyp, olar aýdandyq ishki ister bólimine habarlasqan. О́tken jyly «Erligi úshin» medalimen marapattalǵanda E.Tań­jary­qovtyń adal, patrıottyq isine rıza aýyldastary ózinen buryn qýandy. 
Polıseıdiń isi jeńil emes. Aýyldarda ekiniń birinde urlyq bolady. Ýchaskelik ınspektordyń sońyna túsip, uryny ustamaı qoı­maıtyn tabandylyǵyn tur­ǵyn­dar jaqsy biledi. 2015 jyly jaz­da aýyldaǵy dúkenge ury tústi. Aýyl dúkeninde dabyl be­retin qurylǵy durys is­teı ber­­meıdi. Urylar sony paı­da­lanyp, úptep ketken ǵoı. Er­lan dúkenge jaqyn jerden ma­shı­nanyń izi men shylymnyń qal­dyǵyn baıqady. Ábden psıho­log bolyp alǵan ınspektor «osy shylymdy ury shegýi áb­den múmkin» dep, mashınanyń izi­ne túsip berdi. Shylymnyń tu­­qylyn orap salyp aldy. Iz po­lıseıdi bir úıdiń qasyna alyp kel­di. Qaqpadan úıge kire beriste álgi ózi taýyp alǵan shylymnyń tuqyly taǵy da aldynan shyqty. Urylardyń osy úıde ekenine onyń kúmáni qalmady. Olar dú­ken­­nen jymqyrǵan azyq pen zat­tardyń barlyǵy úıden tabyl­dy. Mundaı oqıǵalar E.Tań­ja­ry­qovtyń tájirıbesinde jıi kezdesedi. 
Taran aýdanyna qarasty Beregovoe, Nagornoe eldi meken­deri Rýdnyı qalasyna jaqyn bolǵandyqtan, aýylǵa keletin kelimsekter barshylyq. Qala bolǵan soń, onda qylmys ta, túrmeden shyǵyp keletinder de kóp. Qaladan nápaqasyn tap­paǵandar jaqyn aýyldar­ǵa yǵysyp kelip, urlyqqa da, bas­qa qylmysqa da daıar turady. Jyl saıyn osy aýyldyq okrýgte ishkilikke salynǵan onshaqty adam erekshe esepte turady. Olar­­dyń sany munan da kóp bo­la­tyn, ınspektor jergilikti sha­­rýashylyq basshylarymen kelisip, olardy jumysqa ornalastyryp, esepten aldy. 
E.Tańjaryqov oqýdan keıin Taran aýdanyna jas maman re­tinde kelgen bolatyn. О́ziniń bolashaq jaryn da osy qutty mekeninen tapty. Zaıyby Dınara onyń kún demeı, tún demeı júgi­retin qıyn jumysyn jaqsy tú­si­nedi. Keıde tún ortasynda, keıde tań ata jubaıynyń shyǵyp ket­kenin sezbeı de qalady. Qaýip­ti de qıyn oqıǵalar týraly ózine keıin aıtyp bergende ǵana ýa­ıymdap júretini bar. Jas otbasynda balalary ósip keledi. 
Qostanaı oblystyq Ishki ister departamentinde oblys po­lısııasynyń mýzeıi ju­mys isteıdi. «Erligi úshin» meda­lin keýdesine taqqan Erlan Tańja­ryqovtyń sýreti mýzeıdegi erlik isteri úshin el maqtanyshyna aınalǵan áriptesteriniń qataryn tolyqtyra tústi.

Názıra Járimbetova,
«Egemen Qazaqstan»

Qostanaı