«Aǵa urpaqqa, ákelerimiz ben analarymyzǵa, soǵys jáne eńbek ardagerlerine taǵy da alǵysymyzdy, júrekten shyqqan jyly sózimizdi jetkizýdiń sáti túsip tur. 30 jyl ishinde ardagerler qozǵalysy úlken joldan ótti, oblysymyzdaǵy eń yqpaldy qoǵamdyq kúshtiń birine aınaldy. Bir isti bastarda biz ylǵı da aǵa urpaqty tyńdaımyz, olardyń batasyn alamyz» dedi Arhımed Begejanuly.
Ardagerler ózderin áli de qatardamyz dep biledi. Olar jastardy otanshyldyqqa, patrıottyq sezimge tárbıeleýge atsalysady, qoǵamdyq jumystardan da qalǵan joq. Olardyń barlyǵy da elimizdiń ekonomıkasy men áleýmettik damýyna atsalysqan jandar. Ardagerler baı tájirıbesin keıingige aıtýǵa, keńes berýge jalyqqan emes. Muny oblystyq ardagerler keńesiniń tóraǵasy Kenjebek Ýkın de atap ótti.
«Ár urpaqtyń tarıhı paryzy bar. Ardagerler keńesi Uly Otan soǵysy tarıhyna, maıdanda qaza tapqan jerlesterimizdiń esimin máńgi este qaldyrý úshin jumys jasap keledi. Soǵysta, jyldary qaza tapqandardyń 280 esimi anyqtalyp, olar eske alý taqtalaryndaǵy tizimdi tolyqtyrdy. Oblys óńirinde 31 áskerı-patrıottyq klýb bar. Oblystyq ardagerler keńesi sonyń barlyǵymen tyǵyz baılanysta jumys isteıdi» dedi Kenjebek Úkiuly.
Saltanatty jınalysta ardagerler qozǵalysyna belsene qatysqandarǵa merekelik medalder, «Ardagerler uıymy» respýblıkaldyq qoǵamdyq uıymynyń eskertkish belgisi jáne oblys ákimi men oblystyq máslıhat hatshysynyń alǵys hattary, dıplomdary, maqtaý qaǵazdary tabys etildi.
Názıra Járimbetova,
«Egemen Qazaqstan»
Qostanaı
Sýret ng.kz saıtynan alyndy
