Negizinen qytaılyq ınvestorlar aýdan aýmaǵyn ınvestısııalyq jobalardy iske asyrý alańy retinde paıdalanýdy qarastyrýda. Esil aýdany ákimdiginiń habarlaýynsha, qytaılyq ınvestorlar bıologııalyq massany, ıaǵnı bıdaıdan qalǵan sabandy óńdeý kólemin jylyna 500 tonnaǵa jetkizýdi oılastyryp otyrǵan kásiporyn salýdy kózdeýde. Atalǵan jobaǵa salynatyn jalpy ınvestısııalyq qarjynyń kólemi 300 mln AQSh dollary bolsa, ony qytaılyqtar óz moıyndaryna alyp otyr. Onyń ústine kásiporyn aýdan turǵyndaryna 500-ge tarta jańa jumys oryndaryn usynatyn bolady. Joba boıynsha kásiporyn jylyna 10 mln tonna suıyq jáne qurǵaq tyńaıtqyshtar shyǵarý qýatyna ıe. Sonymen qatar, zaýytta 5 myń tekshe metr metan óndirilip, 120 mln kVt elektr qýatyn óndirýge múmkindik týady. Onyń ústine 70 myń tonna bıohımııalyq lıgnın (kóptegen óndiristerde jáne medısınada qoldanylatyn qymbat hımııalyq shıkizat) shyǵaryp, Eýropa men Qytaıǵa eksporttaýǵa múmkindik bar. Sonymen qatar, jyl saıyn 20 myń tonna joǵary sapaly qaǵaz ben 200 myń tonna karton shyǵarý úshin zaýyt sellıýloza shıkizatyn óndire alady.
Jobanyń artyqshylyǵy – aýylsharýashylyq shıkizatyn qaıta óńdep, odan taza ekologııalyq jolmen elektr qýatyn óndire alady. Osyǵan oraı qytaılyq delegasııa Esil qalasynyń ortalyq jylý qazandyǵynyń jumysymen tanysyp, kásiporyn qurylysyn júrgizetin jáne shıkizat saqtaý qoımalaryn salatyn jer ýchaskelerimen tanysty. Sondaı-aq, delegasııa ókilderi aýdan ortalyǵynyń temir jol jáne tas jol logıstıkasynyń múmkindikterimen, sýmen qamtamasyz etýdiń jaıymen jaqyn tanysýǵa múmkindik aldy. Qytaılyq tarap ózderiniń ınvestısııalyq jobalaryn iske asyrýǵa qajetti aýdan logıstıkasynyń damýy deńgeıine, ınfraqurylymynyń qamtamasyz etilgenine kóz jetkizip, kóńilden shyqqandyǵyn bildirdi.
Asqar Turapbaıuly,
«Egemen Qazaqstan»
Aqmola oblysy
