Máselen, saryaǵashtyq sharýalar aýdandaǵy qarbyz ósiretin Bozaı, Jambyl aýyldyq okrýgterindegi 720 ga egistikten 170 tonna qarbyzdyń erte pisetin surypyn jınap, kórshi memlekettiń Magnıtogorsk jáne Beloresk qalalaryna jóneltti. Jergilikti qojalyq ıeleri qarbyzdyń kelesi partııasyn saýdalaýǵa daıyndalyp júr. Taıaýda 200 tonna qarbyz taǵy da elimizdiń soltústik aımaqtaryna jol tartady dep kútilýde.
Jalpy, saryaǵashtyqtar baqshalyqtan ótken jyly 105 myń tonna qaýyn-qarbyz jıǵan bolatyn. Bıylǵy boljam 120 myń tonnaǵa jetedi deıdi aýdandyq aýyl sharýashylyǵy bóliminiń mamandary. Al Saryaǵashta baqsha ónimderi 4,5 myń ga alqapqa egilse, onyń 3,5 myń ga-nda qaýyn-qarbyz baptalýda. Onyń ishinde 720 ga tanap erte pisetin qarbyz túrine arnalǵan.
Maqtaaraldyq qarbyz ósirýshiler de kórshiles aýdandaǵy áriptesterinen qalysar emes. Onda búginde 100 tonna qarbyz Reseıge eksporttalyp úlgergen. Aýdandaǵy «Atameken» aýyldyq okrýginiń dıqandary qarbyzdyń ár kelisin 150 teńgeden ótkizip jatyr. Al jalpy bıyl Maqtaaral aýdanynda 5700 gektarǵa qarbyz egilgen.
Shardaralyq sharýalardyń da baqsha ónimderi barshylyq. Ondaǵy Jaýshyqum aýyldyq okrýginde qarbyz egýmen shuǵyldanyp jatqan dıqandar alǵashqy 30 tonna ónimdi Reseıdiń Iаkýtııa avtonomııalyq respýblıkasyna satylymǵa jóneltti. 2 gektar alqapqa jamylǵy astyna erte pisetin qarbyz tuqymyn otyrǵyzǵan «Baǵdat» sharýa qojalyǵynyń dıqandary plenkany qos qaptama túrinde jaýyp shyqqan eken. Birinshi bolyp egistik alqaptan ónim artqan qojalyq tóraǵasy B.Shynazbaev ár gektarynan kem degende 40 tn-dan qarbyz alýdan úmitti.
Shardara aýdany boıynsha jaýshyqumdyq sharýalar jamylǵy astyna ónim egýden aldyńǵy orynda tur. Aýyl ákimi Serik Mahambetovtiń málimetinshe qazirgi tańda 3312 gektar aýmaqqa baqsha daqyldary ornalastyrylǵan. Munyń 100 paıyzy jamylǵy astyna egilip otyr. Kóktem bastalysymen qarbalas tirlikke kóshetin dıqandar qaýymy plenka astyna daqyl egýdiń shyǵyny ár gektaryna 500 myń teńgeni shamalaıtynyn aıtady. Degenmen, naryqqa erte shyǵaryp úlgerse shyqqan shyǵynnyń orny tolady.
Jalpy, bıyl Ońtústik Qazaqstan oblysy boıynsha 53,4 myń ga jerge baqsha daqyldary egilgen. Onyń 32 myń gektarynda qaýyn daqyly ósip jatsa, 21 myń gektary qarbyz alqaby. Oblystyq aýyl sharýashylyǵy basqarmasy mamandarynyń boljamynsha, 1 shildege qaýyn daqyly da pisip, óńir narqyna jol tartpaq. Aldyn ala esep boıynsha bıyl da aımaq dıqandary 1 mln. tonnaǵa jýyq qaýyn-qarbyz jınap, kól-kósir ónimge qaryq bolady.
