Jıynǵa О́zbekstan, Qytaı, Reseı, Tájikstan, Qyrǵyzstan, Aýǵanstan elderinen birqatar sarapshylar qatysty.
Konferensııa barysynda Ortalyq Azııadaǵy qaýipsizdik pen turaqtylyqtyń búgingi jaǵdaıy men bolashaǵyna qatysty máseleler talqylandy. Naqtyraq toqtalar bolsaq, aımaqtyq kúsh tepe-teńdigindegi Ortalyq Azııa elderiniń, Reseıdiń, Qytaıdyń, AQSh pen EO jáne jetekshi azııalyq memleketterdiń róli, UKShU, ShYU, EVEO, NATO, sondaı-aq ózge de xalyqaralyq uıymdardyń jumysy men ózara árekettestigi jáne osy salalardaǵy aımaqtyq yntymaqtastyq máseleleri qozǵaldy.
"Bizdiń Qaýipsizdik keńestegi turaqty emes músheliginiń barysynda Ortalyq Azııa negizgi baǵyttardyń biri retinde anyqtalǵany belgili. Osyǵan baılanysty BUU-da Qazaqstan Ortalyq Azııadaǵy jaǵdaı, qaýipter, bolashaǵy, osy jóninde qandaı kómekter kórsetý kerektigi jaıly máselelerdi kóterip jatyr. Mine, osy iske baılanysty búgin mańyzdy jıyn ótip jatyr", dedi QR Parlamenti Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev.
Aıan Ábdýálı,
"Egemen Qazaqstan"
