El Prezıdentiniń tapsyrmasy boıynsha Almatyda "Nurly jol" baǵdarlamasynyń ınfraqurylymdyq jobalaryna 20 mıllıard teńge, al daǵdarysqa qarsy baǵdarlama aıasynda turǵyn úı qurylysyna respýblıkalyq bıýdjetten 33 mıllıard teńge bólingen. Almaty ákimi 2016 jyl men bıylǵy jyldyń alǵashqy toqsanynda qalada 4 myńǵa jýyq páter bólingen, ıaǵnı 2014-2015 jyldarmen salystyrǵanda eki esege artqanyn, jyl aıaǵyna deıin taǵy da 4,5 myń páter bólinetinin aıtty.
"Almatyda "Nurly jol" baǵdarlamasy aıasynda alǵashqy bes jyl ishinde quny 140 mıllıard teńge bolatyn 670 myń sharshy metr turǵyn úı salynady. Jyl qorytyndysy boıynsha úı kezeginde turǵan árbir tórtinshi otbasy tıesili páterin alady. Búgin biz kezekte turǵan 120 otbasyǵa páter kiltterin tapsyramyz, olardyń arasynda múgedekter, kópbalaly jáne tolyq emes otbasylar, memlekettik qyzmetkerler, bıýdjet qyzmetkerleri, áskerıler bar. Bulardyń basym kópshiligi - páter jaldap nemes týystarynyń úıin panalap, páter kezeginde uzaq turǵandar. Búgin olar ózderin naǵyz páter ıeleri retinde sezine alady", - dedi Baýyrjan Baıbek.
Almaty ákimi halyqqa páter bólýdi barynsha ashyq júrgizý úshin túrli sharalardyń júzege asqanyn jetkizdi. Budan bylaı úı kezegine qoıý jáne kezektiń jyljýy Elektrondy úkimet portaly arqyly júretin bolady. Sonymen qatar, alǵash ret kezektiń elektrondy ınventarızasııasy engizilgen, ıaǵnı kezekte turǵandar jyl saıyn Turǵyn úı basqarmasyna kelmeı - aq dıstansııalyq júıe arqyly ózine qatysty málimetti biledi. Taǵy bir jańalyq, SMS- habarlar arqyly da qajetti málimetti alýǵa bolady. Bulardan ózge, jyl aıaǵyna deıin adam faktorynsyz, kezekte turǵandar arasynda avtonomdy keste arqyly páter bólý mehanızmi jyl aıaǵyna deıin engiziledi.
