Qalany kógildir otynmen qamtý jaıy týraly "Jetisý OblGaz" mekemesiniń dırektory Vladımır Tohtasýnov baıandady. Onyń aıtýynsha qalaishilik gazben jabdyqtaý jelilerin tartý isinde qazir 200-den astam adam eńbek etýde. Alǵashqy kezektiń jumysy qyrkúıek aıynda aıaqtalsa, jalpy qalany tolyq gazdandyrý isi 2018 jyly támamdalýy tıis. A.Batalov bul isti kelesi jyly tolyq bitirý úshin jumysshylar sany jetkiliksiz ekenin, jumys kestesin ázirlep, soǵan sáıkes jumys isteý qajettigin qatań tapsyrdy. "Taldyqorǵandy gazdandyrý - aımaq úshin asa mańyzdy jobalardyń biri. Sondyqtan belgilengen mejege qol jetkizý úshin kún saıynǵy atqarylǵan jumystaryńnyń esebi bolýy kerek. Onyń bári jumys kestesinde aıqyn kórinip, sol kestege sáıkes jumys júrgizilýi tıis. Qajet bolsa jumysshylar sanyn arttyryńdar", - dedi óńir ákimi. Jalpy, "QazTransGaz Aımaq" AQ Jetisý óndiristik fılıaly qazir qalanyń 25 kóshesi men "Qaratal" shaǵyn aýdanynyń abonentterin kógildir otynǵa qosý jumystaryn bastady. Bıylǵy jyly oblystaǵy gazben qamtylǵan eldi mekender sanyn 123-ke, qamtý kórsetkishin 26%-ke jetkizý josparlanǵan.
