Partııanyń kóshpeli qabyldaýyna otyz turǵyn kelip, túrli máseleler boıynsha aryz-shaǵymdarmen qaıryldy. Solardyń biri Aıymgúl Qadyrmenova áke-sheshesimen birge Esil aýdanynan oblys ortalyǵyna kóship kelipti. Baý-baqsha qaýymdastyǵynda turyp jatqan saıajaıdy qyzyl sý shaıyp ketken. Onyń aıtýynsha, eshqandaı materıaldyq kómek kórsetilmegen. Ata-anasynyń zeınetaqylary az. О́zi bıyl joǵary oqý ornyn bitirip, jumysqa ornalaspaq. Ýnıversıtettiń jataqhanasynda ýaqytsha turyp jatqan kórinedi. Jańa baspana satyp alýǵa múmkindikteri joq.
«Qadyrmenovterdiń otbasy saıajaı aýmaǵynda turǵandyqtan, ótemaqy alýǵa quqylary joq. Soǵan qaramastan demeýshilik kómek beriletin bolady.
Biz buǵan deıin aýdandardy aralap, tasqynnan zardap shekken otbasylardyń jaǵdaıyn kózben kórdik. Túrli kómekter kórsetildi», dedi «Nur Otan» partııasy janyndaǵy qoǵamdyq qabyldaý bólmesiniń meńgerýshisi Jumajan Júkenov.
Jambyl aýdanynan arnaıy kelgen Serikbaı Súıindikov jeti jyl buryn buǵanasyn zaqymdap, ekinshi toptaǵy múgedektik berilipti. Eki ret ota jasalypty. Densaýlyǵynyń dimkástigine qaramastan úshinshi topqa kóshiripti. Ol stasıonarlyq em-dom ala almaı júrgenine renishti.
Oǵan dárigerge qaralý, ambýlatorlyq karta júrgizý, stasıonarlyq em-dom alý sekildi talaptardy oryndaı otyryp, múgedektik dárejesi anyqtalatyny jaıly keńes berildi.
J. Júkenovtyń sózine qaraǵanda, jyl basynana beri partııanyń qoǵamdyq qabyldaýyna 300 myńnan astam adam kelgen. Olardyń tórtten biri turǵyn úı, jer telimderi, eńbekaqy tóleý, eńbek daýlary, taǵy basqa máseleler boıynsha qaırylǵan.
О́mir Esqalı,
"Egemen Qazaqstan"
Soltústik Qazaqstan oblysy
