Zamanǵa qaraı joǵary bilim berý úrdisin jetildirý maqsatynda qurylyp, joǵary dárejede jumys jasap kele jatqan Nazarbaev Ýnıversıtetinde tuńǵysh doktorantýra túlekterine dıplom tapsyrý kezinde Prezıdent Nursultan Nazarbaev: «Ashylǵanyna nebári jeti-aq jyl bolǵan oqý ordasy ózimizdiń elde de, basqa elde de asa bedeldi oqý ornyna aınaldy», degen edi. Sonyń dálelindeı, atalmysh bilim ordasynda qazaqstandyq bilim berý salasynda mańyzdy oqıǵa bolyp tabylatyn Joǵary bilim berý kóshbasshylarynyń VI eýrazııalyq forýmy (EHELF) ótti. 2017 jylǵy forýmnyń taqyryby «Joǵary bilim berýdegi basqarý, kóshbasshylyq jáne menedjment» dep ataldy.
Forýmǵa qatysýshylarǵa arnalǵan beınejoldaýda Memlekettik hatshy Gúlshara Ábdiqalyqova EHELF jumysyna tabys tiledi.
Bul alqaly jıyn is-sharalarynyń baǵdarlamasynda halyqaralyq jáne otandyq sarapshylary, joǵary oqý oryndary jáne bıznes qaýymdastyq ókilderi pikir almasty. Plenarlyq májiliste Nazarbaev Ýnıversıtetiniń tájirıbesin translıasııalaý máselesi aıtylyp, semınarlarda talqylandy. Basqosýǵa Qazaq eliniń, Ulybrıtanııa, Qytaı, AQSh, Avstralııa, Tájikstan, Qyrǵyzstan jáne Reseı sııaqty alys jáne jaqyn shet elderden kelgen 300-den astam zııaly qaýym qatysqanyn aıta ketsek deımiz.
Is-shara barysynda qatysýshylar ártúrli elderde joǵary bilim berýdegi kóshbasshylyqqa qol jetkizý jáne tabysty menedjmentti qamtamasyz etý máseleleri boıynsha óz pikirlerimen, tájirıbelerimen bólisti. JOO-lardaǵy akademııalyq sapa, basqarýdy jetildirý, qazirgi zamanǵa saı kadrlardy daıarlaý jáne joǵary bilimdi damytýdyń basqa da ózekti máseleleri talqylandy.
Plenarlyq májilistiń spıkerligin BoardFocus Advisory atqarýshy dırektory Djýdıt MakKormık (Avstralııa); Magna Charta Observatory bas hatshysy Devıd Lokk (Ulybrıtanııa); Kembrıdj ýnıversıteti Bilim berý fakýltetiniń Bilim berý ınnovasııalary ortalyǵynyń dırektory Kolın Maklaflın (Ulybrıtanııa); Gonkong bilim berý ýnıversıtetiniń vıse-prezıdenti Lýı Taı-Lok atqardy.
Bilim men ǵylymnyń jańa jetistikterin jınaqtaǵan Nazarbaev Ýnıversıtetiniń tájirıbesin translıasııalaý boıynsha semınarlarda kóptegen oılar aıtylyp, tııanaqtaldy. Sol sekildi, akademııalyq standarttardy qoldaýdaǵy sońǵy úrdister talqylandy. Nazarbaev Ýnıversıtetiniń akademııalyq sapany qamtamasyz etý jáne arttyrý salasyndaǵy tájirıbesi jınalǵan jurtshylyq nazaryna usynyldy.
Bilimniń tutastyǵy problemalaryn talqylaý barysynda Ýnıversıtet ókilderi túlekterdiń tabysqa jetýi úshin qajetti daǵdylar men qundylyqtardy ornyqtyrý maqsatynda stýdenttermen oqýdan tys jumystardy jandandyrý jáne jańa bilim daǵdylaryn engizý baǵytyndaǵy tájirıbelerimen de bólisti. Semınarlar ústinde Prezıdent N.Nazarbaevtyń «Bolashaqqa baǵdar: rýhanı jańǵyrý» maqalasyndaǵy naqty tapsyrmalary áńgime arqaýyna aınalyp, qaıta jańǵyrý memlekettiń mereıin asyratynyna basa nazar aýdaryldy. Buǵan qosa, «Jahandyq álemdegi zamanaýı qazaqstandyq mádenıet» baǵdarlamasynyń jobasyna arnaıy toqtaldy.
Bul jolǵy joǵary bilim berý kóshbasshylarynyń jyl saıynǵy Eýrazııalyq forýmy «Kitaphanalyq ózara árekettesý-2017: ýnıversıtet kitaphanasyn damytýdaǵy zamanaýı álemdik úrdister («Library Connect-2017»)» jáne «Ýnıversıtet kitaphanalaryn damytýdaǵy zamanaýı trendter: tájirıbe, problemalar jáne perspektıvalar-2017» atty ǵylymı-praktıkalyq konferensııalarǵa ulasty. Sonymen, joǵary bilim berý isin basqarý, kóshbasshylyq jáne menedjmenti talqylanǵan alqaly forým jumysyndaǵy qozǵalǵan máseleler aldaǵy qoldanysta nátıjeli jumys isteýi tıis.
Súleımen MÁMET,
«Egemen Qazaqstan»
