Pavılondar da, qyzmetkerler de daıyn
«Sońǵy birneshe apta boıy biz kóptegen oqý-jattyǵý ótkizip, tótenshe jaǵdaılarǵa daıyndyq júrgizdik. Negizgi daıyndyq barysyna kórmeniń búkil aýmaǵy jumyldyryldy. Aıta keterligi, 10 maýsymǵa deıin kórme aýmaǵy kelýshiler úshin jabyq bolady», deıdi basqarýshy dırektor. Halyqaralyq qatysýshylarmen jumys departamentiniń dırektory Ilııa Orazaqov qatysýshylardyń 126 myń sharshy metr pavılony tolyq daıyn ekendigin aıtty. «Qazirgi ýaqytta tórt-bes el ǵana qaldy. Olar ózderiniń qurylys-montaj jumystaryn aıaqtaıdy. Biz halyqaralyq qatysýshylardyń operasııalyq quramyn der ýaqytynda jasaqtadyq. Árbir pavılonnyń 30-dan 150-ge deıin qyzmetkeri bar. Olardyń barlyǵy Astanada, jumystarynda belsendi, deıdi ol.
Uıymdastyrýshylardyń sózinshe, josparlanǵan is-sharalar tolyq kólemde oryndalǵan. Qajetti qural-jabdyqtar satyp alynyp, ornatylǵan. Beınebaqylaý, dabyl jáne kirip-shyǵýdy basqarý júıeleri júz paıyz daıyn. Qaýipsizdikti qamtamasyz etýge jumyldyrylatyn qyzmetkerler – quqyq qorǵaý organdary men jeke kúzet qurylymdarynyń qyzmetkerleri qajetti oqytý kýrsynan, tildik daıyndyqtan ótti. Jeksenbilik toptar bir saǵattyń ishinde shamamen 13 myń adamdy qabyldaı alady. Bul rette kútý ýaqyty 30-40 mınýttan aspaıdy.
Servıstik qamtamasyz etý departamentiniń dırektory Dııas Ázbergenovtiń aıtýynsha, kórme aýmaǵynda ornalasqan 7 medısınalyq beket pen 8 jedel járdem kóligi turaqty túrde kezekshilik atqarady. Shara barysynda jumyldyrylatyn 210 medısınalyq qyzmetkerdiń qatarynda dárigerler, feldsherler, reanımatologtar bar.
Kórmege neshe adam keledi?
Kórmege keletin qonaqtar men týrısterdiń naqty sany kóp kóńilin kúpti qylyp júrgen. Uıymdastyrýshylardyń málimetine sensek, kórmege 2,4 mıllıon adam keledi eken. Olardyń 15 paıyzy sheteldik týrıst bolýy kerek.
«Tájirıbege súıensek, kórmege kelýshiler sany boljamnyń 70-80 paıyzy bolady. Al bizdiń jaǵdaıymyzdy bul kórsetkish 85 paıyzdy quramaq. Onyń 15 paıyzy – shetelderden keletin qonaqtar. Mólshermen aıtqanda adamdar sany 600-den 750 myńǵa deıin bolady. Kórmege keletin týrısterdiń 70 paıyzy jaqyn shet elderden bolatyny aıtpasa da túsinikti. Olar negizinen bizdiń kórshilerimiz. Búgingi tańda Qytaıdan shamamen 150-200 myń qonaq keledi dep kútilýde. О́ıtkeni, qytaılyq týrızm agenttikteri bul sharaǵa qatty qyzyǵyp otyr. Taǵy 150-200 myń qonaq Eýropa, Soltústik Amerıka sııaqty aımaqtardaǵy memleketterden keledi. О́kinishke oraı, ishki bólinis qalaı bolatynyn aıta almaımyz», deıdi «Astana EKSPO -2017» UK» AQ Halyqaralyq qatysýshylarmen jumys departamentiniń dırektory Ilııa Orazaqov.
Qazirgi tańda qandaı memleketten qansha adam bıletterdi satyp alyp jatqany anyqtalýda. Jalpy, muny qadaǵalaý qıyn proses kórinedi. О́ıtkeni, ol belgili bir operator arqyly júzege asyrylady eken. Sondyqtan bul málimet keıin taǵy habarlanbaq.
Bıylǵy jármeńke EKSPO-ǵa baǵyshtalǵan
El óńirleriniń Astanadaǵy aýylsharýashylyq jármeńkesi bıyl EKSPO-2017 kórmesine oraılastyrylǵan. Dástúrli sharanyń kórigin ótken aptada Qyzylorda, Atyraý, Batys Qazaqstan oblystarynyń dıqandary qyzdyrdy. О́ńirlik taýar óndirýshiler «Qazaqstan» sport saraıynyń aýmaǵyna ornalasqan 24 saýda shatyrynda 500 tonnaǵa jýyq ónim usyndy. «Memleket basshysynyń tapsyrmasymen jáne Úkimet sheshimimen Aýyl sharýashylyǵy mınıstrligi halyqaralyq kórme kezinde Astanaǵa jetkiziletin aýylsharýashylyq ónimderiniń kólemin arttyrýdy sheshken-tin. Elorda ákimdigimen birlesip, qajetti ónimderdiń kólemin eseptedik. Jalpy esep boıynsha 120000 tonna qajet. Qazirgi tańda keste qurylyp, barlyq oblystarmen kelisimge qol qoıyldy», deıdi Aýyl sharýashylyǵy vıse-mınıstri Tóleýtaı Rahymbekov.
Bas qala turǵyndary men qonaqtaryna qajet taýarlardyń 81000 tonnaǵa jýyǵyn dástúrli rıteılerler ákeletin bolsa, qosymsha 39000 tonnasy turaqty jármeńkeler arqyly jetkizilmek. Mundaı jármeńkelerge qatysýǵa eldiń ár óńirinen 600 myń taýar óndirýshi nıet bildirgen kórinedi. «Bıylǵy maýsymda qala turǵyndary men qonaqtary úshin aýylsharýashylyq ónimderine tapshylyq bolmaıdy», dep sendirdi vıse-mınıstr. Sheneýnik baǵany retteý máselesi de turaqty qadaǵalaýda bolatynyn jetkizdi.
«Bizge ónimderdi jetkizý, logıstıka jáne saýda oryndaryn usyný boıynsha Astana ákimdigi úlken qoldaý tanytýda. Osy joly Qyzylorda oblysynan 45 mln teńgeniń 200 tonnadan astam ónimin jetkizdik. Jármeńkege 40 taýar óndirýshi qatysty. Dástúr boıynsha, 112 tonna kúrish, kókónis, balyq jáne kondıterlik ónimder usyndyq. EKSPO kezeńinde jalpy 7648 tonna ónim ákelemiz dep josparlaýdamyz, olardyń basym kópshiligi – kúrish, balyq ónimderi jáne baqsha daqyldary», deıdi Aýyl sharýashylyǵy basqarmasynyń basshysy Baqyt Jaqanov.
Maýsymnyń 11-12 kúnderi óńirlik aýylsharýashylyq jármeńkesin Atyraý men Jambyl oblystary jalǵastyrady.
Ashat RAIQUL,
«Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
