Qurylǵanyna bir jyldan asa ýaqyt ótken Quqyq qorǵaý organdary akademııasynyń basshysy óńirge oblys ákiminiń arnaıy shaqyrtýymen kelgen. Naıl Farısuly quqyq qorǵaý salasyna kórsetilip jatqan qoldaý úshin jergilikti bılik basshysyna rahmet aıtty.
- Biz quqyq qorǵaý salasynyń materıaldyq-tehnıkalyq bazasyn jaqsartýǵa árdaıym kóńil bólemiz. Byltyr memleket qazynasynan 1,5 mlrd teńge bólip, polısııa qyzmetkerlerine 50 avtokólik, 30 beınekamera alyndy, atty polısııa bólimi úshin arnaıy baza jasaqtaldy. Bıyl jańadan Jedel basqarý ortalyǵy salynyp jatyr, bul jerde barlyq beıneaqparat jınaqtalyp, jedel is-áreket úılestirilip otyrady. Mundaı qamqorlyq bıyl da jasalady, taǵy 50 avtokólik alynady, - dedi óńir basshysy Altaı Kólginov.
Degenmen, materıaldyq-tehnıkalyq ıgilik qansha jasalsa da, polısııanyń óz boıynda biliktilik, kásibılik bilim tómen bolsa, nátıje de az bolady. Sondyqtan Quqyq qorǵaý organdary akademııasy Batys Qazaqstan polısııasy úshin arnaıy baǵdarlama ázirlep, oqytýǵa kirispek. Bul kýrstarda polısııa qyzmetkerleriniń mádenıeti men ádebi, elmen qarym-qatynas jasaý úlgileri, ártúrli jaǵdaıda ózin ózi ustaý máneri, psıhologııalyq keńester molynan berilmek. 28 maýsymda bastalatyn alǵashqy trenıngti belgili Reseı bıznes-jattyqtyrýshysy Radıslav Gandapas ótkizbek.
Naıl Ahmetzakırov óz sózinde polısııanyń abyroı-bedeli qyzmetkerdiń kásibı biliktiligi men ádebine, jurtpen qarym-qatynas tásilderin meńgerýine tikeleı baılanysty ekendigine toqtaldy. «Is tetigin kadr sheshedi» degen qaǵıdany qaıtalaǵan astanalyq meıman batysqazaqstandyq jergilikti polısııa qyzmetkerleri kásibı biliktiligin jetildirý deńgeıi nebári 4% ekendigin, jeke quramdaǵy 1000 adamnyń 39-y ǵana bilim jetildirgenin aıtty. Akademııa jumysyn tanystyryp, onda joǵary bilikti 161 ofıser sabaq beretinin, quqyq qyzmetkerleri úshin kúndelikti paıdalanýǵa yńǵaıly jadynama jınaqtaryn daıyndaǵanyn baıandady.
«Polısııa qyzmetkeri – qoǵamnyń adal kómekshisine aınalýy kerek» dedi Batys Qazaqstan oblysynyń prokýrory Saparbek Nurpeıisov.
- Polısııa qyzmetkerleriniń qyzmeti asa jaýapty ári qaýip-qaterge toly. Beıbit kúnniń ózinde táýelsizdik jyldary Qazaqstanda 700-den asa polısııa qyzmetkeri qyzmet babynda júrip qaza tapsa, 2 myńnan asa qyzmetker túrli jaraqat alǵan. Mert bolǵandardyń ishinde 31 batysqazaqstandyq bar. Qazir kún saıyn 102 nómirine halyqtan 200-300 qońyraý túsedi eken. Mine, osyndaı jaǵdaıda ishki ister salasy qyzmetkerleriniń kásibıligin arttyrý, biliktiligin kóteri birinshi orynda turýy tıis, - dedi Batys Qazaqstan oblystyq Ishki ister departamentiniń bastyǵy, polısııa general-maıory Maqsuthan Ábilazımov. Batys Qazaqstan oblystyq Jergilikti polısııa qyzmetiniń basshysy Manarbek Ǵabdýllın ózi basqaryp otyrǵan saladaǵy myńnan asa qyzmetkerdiń 37 paıyzy – serjant, 47 paıyzy – ishki ister salasyna kelgenine 5 jyl tolmaǵan jas maman ekendigin aıtyp, akademııalyq kýrstyń óte qajettigin maquldady.
Jıyn barysynda oblys ákimi Altaı Kólginov «Turǵynúıjınaqqurylys» bankimen kelisip, baspanaǵa muqtaj polısııa qyzmetkerlerine arnap kóp qabatty úı turǵyzý josparymyzda tur» degen jaqsy jańalyqty jarııa etti. Batys Qazaqstan oblystyq Ishki ister departamentiniń bastyǵy, polısııa general-maıory Maqsuthan Ábilazımovtyń aıtýynsha, oblys boıynsha 620 polısııa qyzmetkeri turǵyn úı kezeginde tur eken.
Qazbek Quttymuratuly,
«Egemen Qazaqstan»
Oral
Sýretterdi túsirgen Aıbatyr Nurash
