Qasym-Jomart Toqaev degenmen ǵylym salasynda sheshilmegen túıtkilder de az emes ekenine toqtaldy.
«Mysaly, byltyr University Medical Center mekemesine qarasty Júrek ortalyǵynyń dárigerleri ALEM (Astana Life Ex-situ Machine) dep atalatyn ınnovasııalyq medısınalyq qurylǵy oılap tapty. Muny ótken jyldyń eń aıtýly ǵylymı jańalyǵy dep aıtýǵa bolady. Osy qurylǵy donorlyq aǵzalardyń ómirsheńdigin 24 saǵattan astam ýaqyt saqtaýǵa múmkindik beredi. Mundaı biregeı jańalyqtar qazaq ǵylymynyń áleýeti, jalpy elimizdiń damý deńgeıi joǵary ekenin kórsetedi. Men naýryz aıynda ál-Farabı atyndaǵy Qazaq ulttyq ýnıversıtetinde bolǵanymdy bilesizder. Sol jerde ǵalymdarmen arnaıy kezdesip, biraz máselege toqtaldym. Ásirese, ǵylymdy qarjylandyrý jumysyn retke keltirip, qatań baqylaýǵa alý qajettigi týraly aıttym. Basty maqsat qarjyny ıgerý emes, qoǵamǵa paıdasy tıetin jobalardy júzege asyrý bolýǵa tıis», dedi Prezıdent.
Memleket basshysy sonymen qatar ınjenerlik-tehnıkalyq kadrlardy daıarlaý, ǵylym qalashyqtaryn damytý máselelerine nazar aýdardy.
Prezıdent: Adamzattyń barlyq jetistigi – ǵalymdardyń zııatkerlik eńbeginiń jemisi
«Bilikti ınjenerlik-tehnıkalyq kadrlardy daıarlaýǵa basa nazar aýdarǵan jón. Bul rette negizgi jaýapkershilik joǵary oqý oryndaryna júkteledi. Ulttyń zııatkerlik qýaty dál osy bilim ordalarynda qalyptasady. Ýnıversıtetter óz mıssııasyn adal atqarsa, bilikti mamandar men kásibı kadrlardyń qatary arta túseri sózsiz. Budan bólek, ǵylym qalashyqtaryna jáne qarqyndy damıtyn qalalarǵa jańa tehnologııa engizýdi jolǵa qoıýymyz kerek. Qazir Kýrchatov qalasyna ǵylym qalashyǵy mártebesin berý úshin naqty jumys júrgizilip jatyr. Investorlardy osyndaı damý ortalyqtaryna qarjy salýǵa yntalandyrý qajet. Bul da – Úkimettiń ózekti mindetteriniń biri. Toqeterin aıtsaq, alda atqaratyn sharýa kóp. Shıraq qımyldap, tııanaqty jumys isteýimiz kerek. Ǵylym salasyndaǵy kúrdeli máselelerdi memleket pen ǵylymı qaýymdastyq kúsh jumyldyryp, birlese sheshedi dep oılaımyn», dedi ol.
Qasym-Jomart Toqaev: Ǵylym ekonomıka men qoǵamnyń suranysyna saı bolýǵa tıis
