Mádenıet – mártebemiz, sport – maqtanyshymyz

Memlekettik organ basshysy sóziniń álqısasyn halyqaralyq kórme haqynda bastady. Ol oryndy da. Sebebi, shekaramyzdy attap, shetel asyp kelip jatqan qonaqtardyń biri ekonomıkamyzdy baqylap kelse, endi biri mádenı ahýalymyzǵa kóz júgirteri anyq. 
«Qazirgi ýaqytta álemniń bar nazary bizdiń elordamyz Astanaǵa aýyp otyr­ǵan shaq. Elimizdiń tarıhynda tuńǵysh ret ótip jatqan aýqymdy da, mańyzdy oqı­ǵaǵa álemniń túkpir-túkpirinen kelip jatqan qonaqtardy qarsy alyp otyrmyz. Barlyq kelýshiler EKSPO-nyń máde­nı baǵdarlamalaryna belsendi túrde qatysady jáne kórmeniń keremet mazmundy shyǵarmashylyq baǵdarla­ma­larynan lázzat alýǵa, Qazaqstan halqy­nyń biregeı ózindik tarıhı muralarymen, onyń qazirgi zamanǵy jetistikterimen tanysýǵa múmkindik alady. Tek ótken kún­derdiń ózinde EKSPO-ǵa arnaıy salyn­ǵan «Etnoaýyl» ulttyq-mádenı keshe­nin birneshe myńnan astam adam tama­shalaǵan. «Non-stop» rejiminde jumys isteıtin «Etnoaýylda» qazaq hal­qynyń sándik-qoldanbaly óneri, ulttyq sport, dástúrli ańshylyqtyń túrleri, ulttyq taǵamdar, sonyń ishinde Qazaqstan halqy Assambleıasynyń ashanalary, óńirlerdiń Mádenı kúnderi jáne taǵy basqalar usynylady. Alǵash ret «Etnoaýyl» aýmaǵynda Nomad Way etnomýzyka festıvali boldy. Erteń Qurmanǵazy atyndaǵy dástúrli oryndaýshylar konkýrsynyń Gala-konserti ótedi. «Etnoaýyl» tutas úsh aı boıy jumys isteıdi, ári qaraı ony turaqty ótkizýdi dástúrge aınaldyrýdy josparlap otyrmyz», dedi mınıstr. 
Sonymen qatar, ol 11 maýsymda Qazaqstan Respýblıkasynyń Pre­zıdenti N.Á.Nazarbaevtyń júldesine at sporty túrlerinen «EKSPO kýbogy» ótkenin tilge tıek etti. 
«Jarys joǵary deńgeıde ótti. Elimizden bólek, Reseı Qyrǵyzstan, О́zbekstan, Polshadan qatysýshylar keldi. Aıta keteıik, Mádenıet jáne sport mınıstrligi EKSPO-2017 ha­lyq­­­aralyq mamandandyrylǵan kórmesi aıasynda halyqaralyq deńgeı­degi 18 aý­qymdy sporttyq shara uıymdas­tyrady. Eli­mizdiń óńirleri de sport­tyq jarystardan qa­lys qalmaıdy. Ha­lyqaralyq kórme aıa­synda Qazaqstannyń 14 oblysynda 20-dan astam sporttyq saıys ótkiziledi», dedi A.Muhamedıuly.
Jıyn barysynda vedomstvo basshysy ótken jyldyń ózekti tustaryna sholý jasap, 2016 jyldan bastap mınıstr­lik tarapynan 160-tan astam norma­tıv­tik-quqyqtyq aktiler ázirlengenin, «Má­denıet týraly», «Dene shynyq­tyrý jáne sport týraly» zańdar jańar­tylǵanyn, «Lotereıalar jáne lotereıa qyzmeti týraly» jańa zań jo­basy qabyldanǵanyn, «Arhıv isi má­seleleri týraly» jáne «Kınema­tografııa týraly» zańdardyń jobalary daıyndalǵanyn aıtyp ótti.
Beıjiń, London, Rıo-de-Janeıro Olımpıadalarynda sportshylarymyz tolaǵaı tabystarǵa qol jetkizgeni sport salasyndaǵy júıeli jumystardyń nátıjesi deýge bolady. Iá, byltyr ǵana ótken XXVIII qysqy Dúnıejúzilik ýnıversıada da elimiz alǵash ret Qytaı, Japonııa, Koreıa, Fransııa syndy memleketterdi basyp ozyp, 2-shi orynǵa kóterildi. Bul mıllıondaǵan qazaqstandyq úshin sportpen aınalysýǵa jáne salaýatty ómir saltyn qoldaýǵa basty sebep bolyp, jańa serpin bergeni sózsiz.
Baıandama barysynda Arystanbek Muhamedıuly Qanat Islam, Gennadıı Golovkın, Janqosh Turarov sııaqty qazaqtyń atyn shyǵaryp, abyroıyn asyrǵan sportshylar sport salasyna ǵana emes, elimizdiń dańqyn kóterýde de  súbeli úles qosqanyn atap ótti. 
P.I.Chaıkovskıı atyndaǵy H H­a­lyq­­aralyq jasóspirimder baıqaýy, «Sham­balany izdeý jolynda: Nıko­laı Rerıhtiń Nıý-Iorktegi mýzeıi­nen alynǵan jaýharlar» atty kórme­si, «Sultan Beıbarys jáne onyń dáýi­ri» kórmesi, ıtalııalyq kompozıtor Dj.Verdıdiń «Aıda» operasy, «Romeo men Djýletta» mıýzık­li, «Qytaıdyń Sın Shıhýandı ımpera­torynyń Terrakota áskeri» atty kór­mesi, E.Brýsılovskııdiń «Qyz Ji­bek» operasy, L.Mınkýstiń «Don Kıhot» ba­leti osy jáne ózge de konserttik baǵ­dar­­lamalardyń barlyǵy EKSPO-2017 ha­lyq­aralyq kórmesiniń aıasynda uıym­dastyrylatynyn aıta ketsek deı­miz. 
Sóz sońynda mádenıet jáne sport mınıstri EKSPO-nyń tutas ótý kezeń­inde mınıstrlikpen 1400-den astam má­de­nı jáne sporttyq is-sharany ótkizý josparlanǵanyn jetkizdi.
«Jalpy barlyq is-sharalar týraly habarlandyrýlar úzdiksiz túrde jarııa­lanyp otyrady. EKSPO-nyń tutas ótý kezeńinde mınıstrlik tarapynan 1400-den astam mádenı jáne sporttyq is-sharany ótkizý josparlanǵan. Barlyq mádenı nysandar men sporttyq alańdar úzdiksiz jumys isteýde. Kóptegen is-sharalarǵa bıletter olardyń bastalýynan buryn satylyp ketken. Munyń ózi álemge qazaqstandyq mádenıet pen sporttyń zor múmkindikterin ashyp kórsetedi», dedi Arystanbek Muhamedıuly.