Foto: Qarjy naryǵyn retteý jáne damytý agenttigi
Endi bankter men mıkroqarjy uıymdary saqtandyrý agentterine tólenetin komıssııalyq syıaqyny saqtandyrý syılyqaqysynyń 10% deńgeıinen asyrmaıdy. Buǵan deıin bul kórsetkish keı jaǵdaılarda 90%-ǵa deıin jetken, bul tutynýshylar úshin qosymsha shyǵynǵa aınalǵan.
Jańa talaptarǵa sáıkes, bankter men MQU qaryz berý kezinde saqtandyrýdy mindetteýge nemese belgili bir saqtandyrý kompanııasyn tańdaýǵa májbúrleýge quqyly emes. Saqtandyrý rásimi erkin tańdaý negizinde júzege asady. Eger usynylǵan sharttar qanaǵattandyrmasa, qaryz alýshy ózge saqtandyrý uıymyn tańdaı alady.
Qarý asynǵanǵa – qaryz joq: Sarbazdarǵa nesıe berýge nege tyıym salynbaq?
Mańyzdy jańalyqtardyń biri – qaryz alýshynyń saqtandyrý shartyn jasalǵan kúnnen bastap 14 kún ishinde bas tartý quqyǵynyń saqtalýy. Mundaı jaǵdaıda bankter men mıkroqarjy uıymdary qaryz shartyndaǵy syıaqy mólsherlemesin nemese komıssııany qaıta qaraýy múmkin.
Sonymen qatar qaryz shartyn jasaý kezinde saqtandyrý talap etilmese, syıaqy mólsherlemesi nemese komıssııa alǵash bekitilgen deńgeıden aspaýy tıis. Bul norma tutynýshylardy qosymsha shyǵyndardan qorǵaýǵa baǵyttalǵan.
Taǵy bir mańyzdy ózgeris – saqtandyrý shartyn buzý kezinde tólengen syılyqaqyny qaıtarý tártibi naqtylandy. Qaryz alýshy mindettemesin tolyq ótegen jaǵdaıda, saqtandyrý uıymy paıdalanylmaǵan kezeńge sáıkes qarajatty qaıtarýǵa mindetti. Bul somadan tek 10%-dan aspaıtyn shyǵystar ǵana shegerilýi múmkin. Qaıtarý ótinish berilgen kúnnen bastap 5 jumys kúni ishinde júzege asady.
Mamandar azamattarǵa saqtandyrý shartyn rásimdeý kezinde onyń barlyq talaptaryn muqııat zerdeleýdi, sonyń ishinde syıaqy men agenttik komıssııa mólsherine erekshe nazar aýdarýdy usynady.
Engizilgen ózgerister ádil ári básekege qabiletti saqtandyrý naryǵyn qalyptastyrýǵa, sondaı-aq azamattardyń qarjylyq saýattylyǵyn arttyrýǵa yqpal etpek.
