«Qazaqstan – Nıderlandynyń halyqaralyq qaýipsizdik máseleleri jónindegi asa mańyzdy seriktesi. EKSPO-2017 kórmesi jasyl energetıka taqyrybyna arnalyp otyrǵany belgili. Biz birlese kúsh jumyldyra otyryp, osy salada ozyq sheshimderdi tabatynymyzǵa senimdimin», – dep atap ótti mınıstr óz sózinde.
Sonymen qatar, Nıderlandynyń ulttyq kúnine oraılastyrylǵan basty shara Holland Innovation Challenge atty ekologııalyq baıqaýynyń qorytyndysyn jarııalaý bolatyn.
Nıderlandynyń EKSPO-2017 kórmesine qatysýy aıasynda uıymdastyrylǵan bul jastar jobasyn tolyǵymen eldiń Syrtqy ister mınıstrligi qarjylandyrǵanyn aıta ketken jón.
2016 jyldyń qazan aıynan bastap 6 komanda EKSPO-2017 taqyryby aıasynda 4 nıderlandylyq kompanııaǵa arnap jańa bıznes-tujyrymdamalar daıyndaý maqsatynda jumys júrgizgen bolatyn. Ár komanda quramynda eki qazaqstandyq jáne eki nıderlandylyq stýdent birlese jumys atqarǵanyn atap ótý qajet. Qazaqstan tarapynan Narhoz ýnıversıteti men Qazaq ulttyq agrarlyq ýnıversıtetiniń stýdentteri, al Nıderlandy tarapynan Vagenıngen ýnıversıtetiniń (Wageningen), Ýtreht ýnıversıtetiniń (Utrecht university) jáne Gronıngen ýnıversıtetiniń (Groningen university) stýdentteri qatysty. Joba Nıderlandtyń Kásipkerlikti qoldaý jónindegi agenttigimen (RVO) birlese otyryp júzege asyryldy.
Nıderland ekonomıka mınıstri Henk Kamp jeńimpaz komandaǵa júldeni tabystap, qazylar alqasynyń tańdaýyna baılanysty pikirin bildirdi. «Qazylar alqasy Aquamotion komandasynyń jumysyn birneshe sebepterge baılanysty tańdady: birinshiden, komandanyń ıdeıasy asa ózekti ári EKSPO-2017 taqyrybyna sáıkes keledi; ekinshiden, olardyń usynǵan tujyrymdamasy ınnovasııalyq jobaǵa jatady, olar durys sheshimdi tabý úshin talaı máselelerdi zerttep shyǵýy kerek boldy; úshinshiden, kóterilgen másele, ıaǵnı taza aýyz sýyna qol jetkizý – áleýmettik mańyzǵa ıe bolǵandyqtan, qoǵam men el azamattary úshin asa qajet. Sol sebepti biz baıqaý júldesin osy komandaǵa tabystaýdy uıǵardyq», – dep atap ótti mınıstr.
Aıdar О́RISBAEV,
«Egemen Qazaqstan»
