Dinı saýattylyq – qaýipsizdik dińgegi

Semınardy ashqan Din isteri jáne azamattyq qoǵam vıse-mınıstri Berik Aryn   búginde din salasyndaǵy eń basty mindet  el damýynyń zaıyrly qaǵıdattaryn saqtaý jáne nyǵaıtý ekenin, osy rette azamattardyń ar-ojdan bostandyǵyn saqtaý, dindi tańdaý nemese odan bas tartý quqyǵyn qamtamasyz etý demokratııalyq modeldiń myzǵymas negizi ekenin atap ótti. 
Vıse-mınıstrdiń aıtýynsha, qazirgi tańda búkil álem el­derinde dinı ekstremızm men ter­rorızm qaýpi saqtalyp otyr. Sol sebepti árbir memleket etek-jeńin qymtap, qaýipsizdigin berik ornyqtyrý úshin pármendi sha­ralardy qabyldaý qajet. «El­basynyń «Qazaqstannyń Úshinshi jańǵyrýy: jahandyq básekege qabilettilik» atty Joldaýynyń Úshinshi basymdyǵy retinde din salasyndaǵy máselelerdiń qozǵalýy kezdeısoqtyq emes. Bul álemde jáne elimizde baıqalyp otyrǵan radıkaldyq dinı aǵymdardyń teris ıdeıa­lary­nyń taralýynan týyn­dap otyr. Qazaqstan úshin jat di­nı ıdeologııanyń taralýy elimizdegi musylmandar qaýym­das­tyǵynyń jiktelýine, ózderin mem­leketke, qoǵamǵa jáne Qazaq­stan musylmandary dinı basqar­masyna qarsy qoıatyn adamdar qatarynyń qalyptasýyna alyp keledi. Sondyqtan qaýiptiń aldyn alý úshin memlekettik saıasatty qazaqstandyq qoǵamnyń dástúrli qundylyqtaryna negizdeı otyryp, kúsheıtken abzal», deıdi Berik Saqbaıuly. 
Al Ulttyq kitaphana dırektorynyń keńesshisi, bel­gili saıasatker Aıdos Sarym ra­dıkaldyq dinı aǵymdarǵa tosqaýyl qoıýdy ulttyq tutas­tyqty saqtaýdan bastaý kerektigin aıtty. Onyń oıynsha, búgingi qoǵamda qandaı da máselege degen nemquraılylyq basym. Eger áldekim jat dinniń jeteginde ketti dese, qoǵamnyń belsendi azamattary onyń sebebin izdep, saldarymen birlesip kúresýdiń ornyna,  jaýapkershilikti ózgege, bılikke ysyra salýǵa beıim. «Mundaı nemkettilikpen berik qoǵam negizin qura almaımyz.  Sondyqtan dinı radıkalızmnen týyndaıtyn teris kózqarastar men áreketterge búkil qoǵam bolyp qarsy turýymyz qajet», dedi ol.
Semınar barysynda Din isteri jáne azamattyq qoǵam mınıstrligi jýrnalısterdi  elimizdegi  dinı ahýal týraly sapaly ári dáıekti aqparat taratýǵa,  destrýktıvti jáne ekstremıstik jalǵan dinı ıdeıalardyń taralýyna qarsy turýǵa  shaqyrdy.
Sonymen qatar, aqparattyq óristi dinı taqyryppen toltyrmaýdy da oılaý qajet. Sońǵy ýa­qytta jekelegen  dıskýssııalyq alańdarda jıilep ketken dinı taqy­ryptaǵy talqylaýlar da ár­túrli kózqarastar men ustanym­dardyń qalyptasýyna alyp kele­tin kórinedi. Sondyqtan din sııaqty názik máselede jýrnalıstik ádepti saqtaýdyń da mańyzy úlken.

Qymbat TOQTAMURAT, 
«Egemen Qazaqstan»