Zeınetaqy qorynyń Baspasóz qyzmetiniń habarlaýynsha, búgingi tańda 754,5 myńdaı adam «elektrondyq mekenjaı» boıynsha aqparat alý tásilin tańdaǵan bolsa, 3,3 mıllıonnan astam adam bul úshin Qordyń resmı saıtyn nemese smartfondar men planshetterge arnalǵan «ENPF» uıaly qosymshasyn paıdalaný múmkindigine ıe.
Endi BJZQ 2017 jylǵy 30 maýsymnan bastap www.enpf.kz saıtyndaǵy «Elektrondyq qyzmet kórsetý» bólimi jáne Jeke kabınet arqyly burynǵydan da yńǵaıly qyzmetterdi júzege asyrmaq:
– mindetti zeınetaqy jarnalaryn esepke alý boıynsha jeke zeınetaqy shotyn ashý jóninde ótinish berý;
– zeınetkerlik jasqa tolýǵa nemese 1-shi nemese 2-shi toptardaǵy múgedekterdiń múgedektigi merzimsiz bolyp belgilenýine baılanysty zeınetaqy tólemderin taǵaıyndaý týraly ótinish berý. Alǵashqy ótinishter joldandy, onlaın rásimdeý birneshe mınýtty ǵana alady;
– tólemderdi taǵaıyndaý jáne (nemese) aýdarý jónindegi ótinishtiń oryndalý mártebesin qadaǵalaý.
Mindetti zeınetaqy jarnalaryn esepke alý boıynsha jeke zeınetaqy shotyn ashý jóninde ótinish berý úshin elektrondyq sıfrlyq qoltańbanyń (ESQ)qoldanystaǵy kiltin alý jetkilikti. Zeınetaqy tólemderin taǵaıyndaý jóninde ótinish berý úshin ESQ-dan basqa ekinshi dárejeli bankte nemese «Qazposhtada» (teńge) ashylǵan, 20 sannan turatyn bank shoty týraly málimetti jáne ekinshi dárejeli banktiń derektemelerin kórsetý qajet.
Bul rette BJZQ alýshyǵa tólemderdi taǵaıyndaý/aýdarý jónindegi ótinishtiń oryndalýy týraly SMS-habarlama jiberý arqyly qulaǵdar etedi.
Zeınetaqy jınaqtaryn tóleý nemese aýdarý mártebesi týraly málimetterdi Jeke kabınetten bilýge bolady. Ol úshin salymshylar (alýshylar) aldymen saıtqa tirkeledi. Keıin ESQ nemese JSN (jeke sáıkestendirý nómiri) men qupııa sózdiń (parol) kómegimen Jeke kabınetke kire alady.
Jeke zeınetaqy shotyndaǵy aqsha qozǵalysy týraly qupııalyqty saqtaý maqsatynda zeınetaqy jınaqtarynyń jaı-kúıi týraly aqparatty «ınternet arqyly» alý tásilin tańdaǵan jaǵdaıda ǵana JSN men paroldi tirkeýge bolady. Bul úshin jeke basty kýálandyratyn kýálikpen BJZQ keńsesine júginý qajet.
Al buǵan deıin jeke zeınetaqy shotyn ashý týraly ótinishti, zeınetaqymen qamsyzdandyrý týraly shartty nemese qosymsha kelisimdi rásimdeý barysynda aqparatty «ınternet arqyly» alý tásilin tańdaǵan adamdar úshin BJZQ keńsesine kelýdiń qajeti joq.
Sonymen Ashyq esik kúninde salymshylar BJZQ mamandarynyń kómegimen birneshe mınýt ishinde www.enpf.kz saıtyna tirkelip, uıaly qosymshany júktep alýǵa qol jetkizdi.
Kelýshilerdiń kópshiligin BJZQ-nyń elektrondyq keńesshisi qyzyqtyrǵan. Qazirgi tańda Qor keńselerinde mýltı-tach ekrany bar aqparattyq kıoskiler ornatylǵan. Kelýshiler sol arqyly anyqtamalyq aqparattar alyp, zeınetaqy kalkýlıatory boıynsha ózderiniń bolashaq zeınetaqylarynyń mólsherin boljaldy túrde esepteı alady. Sonymen qatar, aqparattyq kıosk arqyly jeke zeınetaqy shoty boıynsha úzindi-kóshirmeni elektrondy mekenjaıǵa jiberýge bolady. Qazir respýblıka boıynsha 10 aqparattyq kıosk jumys isteıdi.
«Aqparat alýdyń zamanaýı tásilderi otandyq zeınetaqy júıesin árbir azamatqa jan-jaqty ári ońaı túsindirýge múmkindik beredi. Bul jerde zeınetaqy júıesin túsiný kádimgi jeke zeınetaqy shotynyń jaı-kúıi týraly málimet alýdan bastalady. BJZQ salymshylary ózderiniń zeınetaqy jınaqtary týraly onlaın tártibinde aqparat ala otyryp, ózderiniń jumys berýshilerin jáne ınvestısııalyq tabystardyń eseptelýin qadaǵalaı alady ári zeınetaqynyń mólsheri boıynsha boljam da jasaýǵa bolady. Osylaısha, zeınetaqy jarnalary turaqty aýdarylyp turatyn bolsa, zeınetaqy jınaqtarynyń kólemi de artatyndyǵyna kóz jetkizedi. Bul bolashaq zeınetkerdiń berekeli tirshiligin qamtamasyz etýge múmkindik beredi», – deıdi «BJZQ» AQ Basqarma tóraıymynyń orynbasary Sáýle Egeýbaeva.
Tek Almaty qalasynyń ózinde atalmysh sharaǵa 500-ge jýyq adam qatysty.
Aınash ESALI,
«Egemen Qazaqstan»
ALMATY
