Tarıhshy ǵalymdar men qoǵam qaıratkerleriniń, etnomádenı ortalyqtar ókilderiniń, oqytýshylar men stýdentterdiń basyn qosqan otyrystyń maqsaty Táýelsiz Qazaqstannyń memleket jáne ulttyq qurylys retinde qalyptasýynyń basynda turǵan alash qozǵalysynyń atqarǵan roline baǵa berý bolatyn. Alash qozǵalysyn, onyń ıdeıalary men mádenı muralaryn zertteý Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyndaǵy «Týǵan jer» baǵdarlamasynda aıtylǵan máselelermen sáıkes keledi.
«Alash qozǵalysy búgingi Táýelsiz memleketimizdiń irgetasyn qalady. Qazaq halqynyń bolashaǵyn oılaǵan Alash azamattarynyń bilimi men eńbekteri arqasynda Qazaq avtonomııalyq keńestik sosıalıstik respýblıkasy qalyptasty, ol búgin dúnıejúzi tanyp otyrǵan Táýelsiz Qazaqstan Respsýblıkasynyń negizi bolatyn» dedi «dóńgelek ústel» májilisiniń moderatory, tarıh ǵylymdarynyń doktory, professor Erkin Ábil.
Munan keıin sóz alǵandar Alash qozǵalysynyń zerttelýine, nasıhattalýyna jan-jaqty keldi. Oblystyq arhıv jáne qujattama basqarmasynyń qyzmetkeri Saltanat Tasjanova Alash qozǵalysyna qatysty arhıv qujattarymen jumys isteýdiń ereksheligi jáne Qazaqstan men Reseı arhıvterinen tabylǵan jańa qujattar týraly áńgimelese, A.Baıtursynov atyndaǵy Qostanaı memlekettik ýnıversıteti Qazaqstan tarıhy kafedrasynyń dosenti, tarıh ǵylymdarynyń kandıdaty Serikjan Ysmaıylov qazaq halqynyń etnıkalyq aýmaǵynyń saqtalýynda «Alash» kóshbasshylarynyń úlesi týraly aıtty. Al Qostanaı memlekettik pedagogıkalyq ınstıtýty qashyqta oqytý fakýltetiniń dekany, tarıh ǵylymdarynyń kandıdaty Zámzágúl Shahaman Alash qozǵalysy lıderleriniń jańashyl ıdeıalaryna toqtaldy. Sonymen qatar «dóńgelek ústel» basqosýyna qatysýshylar alashtyqtardyń qoǵamnyń rýhanı jańǵyrý úderisindegi róli, oǵan qosqan ólsheýsiz úlesi týraly áńgimeledi.
Májilis sońynda Alash ardaqtylarynyń eńbekteri men ómirin zertteýdi jalǵastyrý, jastardyń patrıottyq sezimin qalyptastyrý úshin olardy barynsha nasıhattaý, ol úshin kóptegen is-sharalardyń taqyryby etý týraly máselelerdi mindettegen qarar qabyldandy.
Názıra Járimbetova
«Egemen Qzaqstan»
QOSTANAI
