Memleket basshysy bıyl elimizdiń syrtqy saıasat salasy úshin mereıli meje bolyp sanalatynyn, osydan 25 jyl buryn Qazaqstannyń dıplomatııalyq qyzmetin qurý týraly Jarlyqqa qol qoıylǵanyn atap ótti.
– Táýelsizdiktiń alǵashqy jyldarynda bizdiń basqa memlekettermen ózara is-qımyl jasaý jónindegi tájirıbemiz de, ózimizdiń dıplomatııalyq qyzmetimiz de bolǵan joq. Dıplomatııalyq kadrlardyń tapshylyǵy erekshe baıqaldy, – dedi Qazaqstan Prezıdenti.
Nursultan Nazarbaev bul problemalar respýblıkadaǵy kúrdeli áleýmettik-ekonomıkalyq jaǵdaımen tuspa-tus kelgenin aıtty.
– Qysqa ýaqyt ishinde dıplomatııalyq korpýs quryp, óz elshilerimizdi shet elderge jiberýge múmkindik aldyq. Mine, shırek ǵasyrdan keıin elimizdiń syrtqy saıasaty tolyq qalyptasty dep aıta alamyn, – dedi Memleket basshysy.
Sonymen qatar, Qazaqstan Prezıdenti egemendigimizdiń alǵashqy jyldarynda elimizde aýmaqtyq tutastyǵymyz ben ulttyq táýelsizdigimizdi saqtap, qaýipsizdigimizdiń berik kepilin qalyptastyra alǵanymyzdy atap ótti.
– Qazirgi kezde Astana halyqaralyq ıadrolyq qarýǵa qarsy qozǵalystyń kóshbasshysy bolyp sanalady jáne álemdegi strategııalyq turaqtylyq pen ádilettilikti qamtamasyz etý isine zor úles qosyp keledi, – dep túıindedi Nursultan Nazarbaev.
Budan bólek, Memleket basshysy Qazaqstannyń óńirlik ekonomıkalyq ıntegrasııa men kooperasııa aıasynda túrli jobanyń bastamashysy bolyp sanalatynyn aıtty.
– Jalpy, Qazaqstanda júrgizilip jatqan kópvektorly syrtqy saıasat pen elimizdiń halyqaralyq bastamalary álemde keń qoldaýǵa jáne tanymaldylyqqa ıe boldy, – dep qorytyndylady Nursultan Nazarbaev.
