«Astana – elimizdiń bas qalasy ǵana emes, ol qazaqstandyqtarǵa rýh beretin táýelsizdigimizdiń sımvoly. Astana – jas, ári bolashaqtyń qalasy», – dedi merekelik sharada sóz alǵan oblystyq sottyń tóraǵasy Aslambek Merǵalıev. Oblystyq sottyń sýdıasy Gúlmanat Artyqbaeva Astana tarıhyna toqtaldy. Ol elimiz úshin ólara kezeń bolǵan táýelsizdiktiń alǵashqy jyldary Astana qalasynyń qalaı ósip jetilgenin tilge tıek etti.
Oblystyq sot ujymy Astana kúnine arnap oblystaǵy sottar qyzmetkerleri arasynda «Astana – meniń astanam, Eýrazııa júregi» atty esse baıqaýyn jarııalaǵan bolatyn. Baıqaýǵa túsken 26 esseniń arasynda úsheýin qazylar alqasy úzdik dep tańdady. Birinshi oryndy – Jitiqara aýdandyq sotynyń jetekshi mamany Ǵazıza Keńesbaeva, ekinshi oryndy – Qostanaı qalalyq mamandandyrylǵan ákimshilik sotynyń qyzmetkeri Aqmaral Hasenova, úshinshi oryndy – Qostanaı aýdandyq sotynyń mamany Darhan Ǵalymov aldy. Olardyń shyǵarmalaryna qazylyq jasaǵan «Qostanaı tańy» gazeti redaktorynyń orynbasary Jumataı Kákimjanov baǵaly syılyqtar tabys etti.
Merekelik shara sottar qyzmetkerleri men sýdıalar kúshimen qoıylǵan konsertke ulasty. Qara qyldy qaq jarǵan ádil sot sýdıalary ónerden de quralaqan emestigin kórsetti. Olar shyrqaǵan patrıottyq ánder men halyq termeleri, myń burylǵan bıler kelýshilerdiń kóńilinen shyqty. Oblystyq sotta mundaı konsert birinshi ret ótkizilip otyrǵanyn aıta ketken jón.
Názıra Járimbetova,
«Egemen Qazaqstan»
QOSTANAI
