Elimizdiń Syrtqy ister mınıstrliginen habarlanǵandaı, kelissózge qatysýshy delegasııalardyń qatarynda toǵyz adamnan quralǵan Sırııa qarýly oppozısııasynyń ókilderi de kelgen. Astana prosesiniń alǵashqy kezeńinen bastap forýmǵa belsene qatysyp kele jatqan BUU Bas hatshysynyń Sırııa máseleleri jónindegi arnaýly ókili Staffan de Mıstýra da bar.
Osy halyqaralyq sharaǵa oraı keshe BAQ ókilderiniń saýalyna Qazaqstan Respýblıkasy syrtqy saıasat vedomstvosynyń basshysy Qaırat Ábdirahmanov Astana prosesiniń besinshi raýndynyń kún tártibi týraly jaýap bergen bolatyn. Mınıstr aıtyp ótkendeı, kezdesý barysynda Reseı, Túrkııa jáne Iran sekildi kepil elder qol qoıǵan 4 deeskalasııa aýmaǵyn qurý týraly memorandýmdy qalaı júzege asyrý josparynda atalǵan aýmaqtardyń shekaralaryn anyqtaý, sonymen qatar, deeskalasııa aýmaqtarynda baqylaý júrgizý joldaryn aıqyndaý jáne ony júzege asyrý syndy máseleler úlken mańyzǵa ıe.
– Esterińizde bolsa, atalǵan memorandýmda deeskalasııa aýmaǵynyń shekarasy boıynsha baqylaý-ótkizý pýnktterin jáne baqylaý pýnktterin ornatý tıistiligi aıtylǵan edi,– dedi Qaırat Ábdirahmanov. Mınıstr aıtqandaı, búgingi tańda Sırııa aýmaǵynda taraptardyń áskerı is-qımyldaryn toqtatý jáne bitimge kelý rejimine 65 qarýly oppozısııalyq top qosylǵan.
Sonymen qatar, Astanadaǵy jıynda IýNESKO-nyń qorǵaýyna alynǵan, atalǵan halyqaralyq uıymnyń dúnıejúzilik mádenı muralarynyń tizimine engen Sırııadaǵy mádenı nysandardy mınalardan tazartý máselesin de egjeı-tegjeıli talqylaý josparlanyp otyr eken.
Keshe kúnniń alǵashqy jartysynda taraptardyń «jabyq esik» jaǵdaıynda kezdesýleri ótti. Kúnniń ekinshi jartysynda kezdesýler keńeıtilgen formatta jalǵasyn tapty. Búgin plenarlyq otyrys ótkiziledi dep josparlanyp otyr.
Reseı Federasııasy prezıdentiniń Sırııa máseleleri boıynsha arnaýly ókili Aleksandr Lavrentevtiń aıtýynsha, keshe Reseı, Iran jáne Túrkııa elderiniń ókilderi úshjaqty kezdesý ótkizgen.
– Maqsatymyz – deeskalasııa aımaqtaryn qurý. Bir aı burynǵy kezdesýde aımaqtardy qurý týraly kelisken bolatynbyz. Birlesken jumys toptary kezdesýler ótkizdi, másele jan-jaqty qarastyryldy. Qazir erteńgi kezdesýde qabyldanýǵa tıis qujattyń túrli bólikterin qarastyryp jatyrmyz,– dedi ol.
A.Lavrentev aıtyp ótkendeı, bul másele búgin sheshimin tabýǵa tıis.
– Barlyq delegasııanyń, onyń ishinde kepil memleketterdiń umtylystary jaqsy, naqty nátıjege qol jetkizýge barlyǵymyz múddelimiz. Iordanııa tarapynyń, Amerıkanyń joǵary deńgeıli delegasııasynyń qoldaýy baıqalady,– dedi A.Lavrentev.
Bıylǵy jyly 3-4 mamyr kúnderi elordada Sırııa máselelerin retteý boıynsha halyqaralyq kezdesýlerdiń tórtinshi raýndy ótkeni belgili. Atalǵan jıynǵa Reseı, Iran, Túrkııa elderiniń, Sırııa úkimetiniń, Sırııa qarýly oppozısııasynyń delegasııalary kelgen bolatyn. Sondaı-aq, BUU Bas hatshysynyń Sırııa máseleleri jónindegi arnaýly elshisi Staffan de Mıstýra, Iordanııa Syrtqy ister mınıstriniń keńesshisi Naýaf Ýasfı Tel, AQSh Memlekettik hatshysynyń kómekshisi Stıýart Djons qatysqanyn aıta keteıik. Tórtinshi raýnd qorytyndysy boıynsha kepil memleketter Sırııa Arab Respýblıkasynda deeskalasııa aımaqtaryn qurý týraly memorandýmǵa qol qoıǵany kelissóz prosesiniń úlken jetistikteriniń biri retinde baǵalanǵan.
Tórtinshi raýnd qorytyndysy boıynsha Reseı, Iran jáne Túrkııa elderi birlesken qujat qabyldap, joǵary deńgeıdegi besinshi kezdesýdi Astanada 2017 jyldyń shilde aıynda ótkizý týraly sheshim qabyldady. Olar Qazaqstan Respýblıkasynyń Prezıdentine Sırııa máseleleri boıynsha halyqaralyq kezdesýler ótkizgeni úshin alǵys bildirgenin de aıta keteıik.
Áýel bastan beıbit bitimge kelýdi qoldaıtynyn ashyq bildirip, beıtarap ustanymyn ańǵartqan Qazaqstan alqaly jıynǵa alań usynýmen ǵana shekteledi. Buǵan deıin elimizdiń syrtqy saıasat vedomstvosy málimdegendeı, resmı Astananyń ustanymy – Sırııa máselesiniń sheshimin tabýyna, taraptardyń ózara mámilege kelýine, beıbit halyqtyń azap shegýin toqtatýǵa úles qosý.
Arnur ASQAR,
«Egemen Qazaqstan»
