Osyndaıda Selınograd qalasy baýyrynda ótken stýdenttik alańsyz shaqtar eske túsedi. El aýzynda «úlken selo» atanyp ketken qalanyń ornynda jasampazdylyq pen qýattylyqtyń sımvolyna, rýhanı qundylyqtar besigine aınalǵan alyp joba iske qosylady deý óńimiz túgil túsimizge enbegen. Ǵajaıyp qııalda ǵana elestete alatynbyz.
Tarıh úshin qas-qaǵym sanalatyn ýaqyt ishinde təýelsiz Otanymyzdyń Tuńǵysh Prezıdenti Nursultan Nazarbaevtyń alys-jaqyndy boljaı biletin kóregen saıasaty arqasynda kúlli elimizdi barsha álemge tanytqan alyp shahardyń Saryarqa kindiginde ornaýy ekiniń biriniń qolynan kelmeıtin ulylyq der edim. Respýblıka turǵyndaryna teńdessiz syılyq, qýanysh syılaǵan táýekeldilik, jankeshtilik qadam el jańarýyna jol salyp, keleshekke degen zor úmitti oıatty.
Qonys aýdarý týraly sheshim qabyldanǵan kezde halqy 290 myńdaı bolsa, ekonomıkalyq, saıası damý jaıyn aıtpaı-aq qoıaıyq, byltyr mıllıonshy turǵynmen tolyǵýynyń ózi demografııalyq máseleniń de qısyndy sheshilgenin aıǵaqtasa kerek. Iri ǵylymı, mádenı, iskerlik ortalyq retinde de, elde turaqtylyq pen ultaralyq kelisimdi nyǵaıtý turǵysynan da zor mańyzǵa, orasan áleýetterge ıe. Álemdik aýqymdaǵy sammıtter men forýmdardyń basyn toǵystyryp, eń ozyq otyz eldiń sapyna qosylýǵa árkez umtyldyryp keledi. Endi 2050 jylǵa taman álemniń eń úzdik qalalarynyń ondyǵyna engizý mindeti qoıylyp, jan-jaqty órkendeýiniń qaryshty qadamdary belgilendi Elbasynyń 2005 jyly jaryq kórgen «Evrazııa júreginde» kitabynan «...Erke Esildiń jaǵasynda boı kótergen, erekshe sáýlettik landshafty bar, biregeı músindik nyshandary sap túzegen, joǵary tehnologııaly bolashaqqa umtylǵan, ózgeni syılap, óziniń jańa astanasy men óz elin sheksiz maqtanysh tutatyn kóp ultty jáne kópdindi ásem de meıirli astanamyz, mine osyndaı qala» degen úzindini keltire otyryp, «joǵary tehnologııaly bolashaqqa umtylǵan» degen tirkestiń mán-maǵynasyna toqtalǵym kelip otyr.
Búginde qazaqstandyqtar ǵana emes, sheteldikter de «EKSPO-2017» halyqaralyq mamandandyrylǵan kórmesin erekshe qushtarlyqpen tamashalaýda. Oǵan 115 memleket pen 22 halyqaralyq uıymnyń qatysýy bedelimizdiń qanshalyqty dárejede ekenin aıǵaqtasa kerek. Bizdiń sharýashylyq jumysshylary men mektep oqýshylary kórme aıasynda tegin saıahat jasap, qyzyqtap qaıtty. Alǵan áserleri taýsylar emes. «Bolashaqtyń energııasyn basty dińgek, negizgi ózek etken EKSPO jahandyq keńistiktegi bıik belesterimizdiń biri ekeni daýsyz.
«Astananyń órkendeýi–elimizdiń órkendeýi» qaǵıdaty jergilikti jerlerde de jańashyl ıdeıalarmen tolyǵa túsýde. Elordaǵa qarap oı da, boı da túzeýge degen maqtanysh sezimi,ásirese, jastarymyzǵa tán qasıet ekeni qýantady. Astana kúnine joǵary jetistiktermen keli–bizdiń ujym úshin qalyptasqan dástúr. Asyl tuqymdy sharýashylyq mártebesine ıemiz. Qazir 600 bas aberdın-angýs sıyry ósiriledi. Jyl basynana beri 300-ge jýyq iri qara maly satyldy. Suranystyń kóptigi eskerilip, analyq bas sanyn 400-ge deıin kóbeıtýdi mejelep otyrmyz. Memleketten jyl saıyn 35 mıllıon teńge mólsherinde sýbsıdııa beriledi. Barsha qazaqstandyqtardy Astana kúnimen shyn júrekten quttyqtaımyn!
Erkebulan MÁMBETOV,
«Mámbetov jáne K» komandıttik seriktestiginiń bas dırektory,
oblystyq máslıhattyń depýtaty,
«Qurmet» ordeniniń ıegeri.
Soltústik Qazaqstan oblysy,
Mamlıýt aýdany.
