Aýdan ortalyǵyndaǵy basty alańǵa súıikti ənshileriniń ónerin tamashalaý úshin 5 myńǵa jýyq kórermen jınaldy. Merekelik dýmanǵa tek mahambettikter emes, oblys ortalyǵy men basqa aýdandardyń, kórshiles oblystardyń turǵyndary da keldi.
Ərtisterdiń konsertinen bólek kórermenderge serýendep, balalardyń ətkenshekter men batýttarda oınaýyna jaǵdaı jasaldy.
«Halyqqa keremet merekelik kesh syılap, osyndaı shara uıymdastyrylǵany bizdi qýantady, – dep əserimen bólisti Mahambet aýdanynyń turǵyny Əıgerim Sərsekeeva. – Sońǵy jyldary bizdiń óńirge Roza Rymbaeva, Maqpal Júnisova, Tamara Asar, Beıbit Qorǵan syndy kóptegen ənshiler keldi. Mine endi «MýzArtty» da kórdik, aýdan ortalyǵynda naǵyz juldyzdardyń ónerine tənti bolǵanymyzǵa rızamyz. Bul biz úshin aıryqsha oqıǵa».
Konsert kezinde Mahambet aýdanynyń eńbek ardagerlerine qurmet kórsetildi, sahnaǵa shaqyrylyp, alǵys hattar men baǵaly syılyqtar tabystaldy.
«Biz Memleket basshysynyń aýyl-eldegi halyqtyń mədenı deńgeıin kóterý, aýyldy damytý týraly tapsyrmasyn basshylyqqa alyp otyrmyz. Aı saıyn qazaqstandyq estrada juldyzdarynyń qatysýymen konserttik baǵdarlama ótkizemiz. Əleýmettik ınfraqurylym jobalaryn da júzege asyryp jatyrmyz, – dedi Mahambet aýdanynyń əkimi Alımuhammed Quttymuratuly. – Bul ıgi isterde oblys basshylyǵy men belsendi turǵyndardyń mol úlesi bar. Keń kólemdi sharalarmen qatar ər apta saıyn EKSPO halyqaralyq kórmesine arnalǵan konsertter ótedi. Oǵan qatysqan turǵyndardyń elimizdegi mańyzdy kórmege tegin bılet utyp alýyna múmkindik bar».
