Tabıǵı ósim jáne kóship kelýshiler esebinen turǵyndar sany kúrt artqan óńirde halyqqa jetkilikti kólemde aýyz sý taýyp berýdi kún tártibine qoıdy. Sondaı-aq, óńirde júrgizilip jatqan óndiristik jumystar, tabıǵı baılyqtardy ıgerý «bizde sý resýrstary shekteýli» dep qol qýsyrýdy emes, tyǵyryqtan jol taýyp shyǵýdy qajet etetini belgili.
Qazirgi tańda Mańǵystaý oblysynda sýmen qamtamasyz etý tushytylǵan teńiz sýy, jer asty sý kózderi, «QazTransOıl» aksıonerlik qoǵamy «Astrahan-Mangyshlak» sý taratqyshy arqyly beriletin Edil ózeniniń sýy sekildi úsh jol arqyly sheshimin taýyp otyr. Osy úsh kóz arqyly ótken jyly oblysty sýmen qamtý kórsetkishi jylyna 41,6 mln. tekshe metr kóleminde bolǵan.
О́ńirdegi teńiz sýyn tushytýmen aınalysatyn «MAEK-Qazatomónerkásip» JShS» Aqtaý qalasy men Túpqaraǵan aýdany turǵyndaryn, al «Kaspıı» sý tushytý zaýyty» JShS Munaıly, Túpqaraǵan aýdandaryna, Aqshuqyr, Telman, Quryq aýyldaryna jáne Aqtaý qalasynyń soltústik bóligine tushy sý jetkizip keledi.
Al jer asty sý ken oryndary sýyn negizgi tutynýshylar Jańaózen qalasy, Mańǵystaý, Beıneý jáne Túpqaraǵan aýdandary bolsa, «QazTransOıl» AQ Astrahan-Mangyshlak» sý taratqyshy arqyly beriletin Edil sýyn Jańaózen qalasy, Mańǵystaý, Beıneý jáne Qaraqııa aýdandary, munaı kompanııalary tutynýda.
Sý jetimsizdigin boldyrmaý baǵytyndaǵy jumystar aıasynda Mańǵystaýda taǵy bir jaǵymdy jańalyq jurtqa jarııa boldy. Ol – «Kaspıı» sý tushytý zaýyty jumysynyń ekinshi satysynyń iske qosylýy. Qaıta jabdyqtaýdan ótip, zamanaýı sý tushytý qurylǵylaryn iske qosqan kásiporynda jumys qýatyn arttyrýǵa múmkindik mol. Jańǵyrtý jumystaryna ulttyq qordan 3 mlrd 138 mln teńge bólingen zaýytta 121 adam qyzmet etedi. «Kaspıı» sý tushytý zaýyty táýligine 30 000 tekshe metr sý óńdeýdi mejelep otyr, bul buǵan deıingi tushy sýdyń berilý mólsherinen 3 ese artyq.
– Elbasymyz óziniń Joldaýynda turǵyn-úı kommýnaldyq sharýashylyǵyn jańǵyrtý, ınfraqurylymdy damytýdyń qajettiligin aldymyzǵa maqsat etip qoıǵany barshamyzǵa belgili. Búgingi «Kaspıı» sý tushytý zaýytynyń qaıta jańǵyrtýdan ótip, halyq ıgiligine paıdalanýǵa berilgenine kýá bolyp otyrmyz. Bul da – Táýelsiz elimizdi damytýǵa, qazir óńirimiz úshin eń ózekti bolyp otyrǵan aýyz sýmen qamtamasyz etý máselesin sheshýge óz septigin tıgizetinine senimdimin. Aldaǵy ýaqytta zaýyttyń jalpy qýattylyǵyn 40 000 tekshe metrge deıin jetkizý josparda bar. Bul joba da sátti júzege asyrylatynyna senemin, – dedi Mańǵystaý oblysynyń ákimi Eraly Toǵjanov zaýyttyń ashylýynda. Ol tutynýshylardy tushy sýmen turaqty qamtamasyz etýdi jáne 2019 jyly Mańǵystaý oblysyn tolyqtaı tushy sýmen qamtamasyz etý úshin zaýyt qýattylyǵyn táýligine
40 000 tekshe metrge jetkizý týraly tapsyrma berdi.
Demek, óńirde tushy sýmen qamtý baǵytyndaǵy jumystar júrip jatyr deýge sebep bar. Bul máseledegi ekinshi bir tetik – turǵyndardyń asa ysyrapshylyqqa jol bermeı, sýdy da ornymen paıdalana bilýi. О́ıtkeni, sýdyń da suraýy bar...
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
