Din máseleleri boıynsha ótken semınar barysynda Din isteri jáne azamattyq qoǵam mınıstri Nurlan Ermekbaev Prezıdent N.Nazarbaev «Qazaqstan Respýblıkasynyń keıbir zańnamalyq aktilerine olardy Qazaqstan Respýblıkasy Konstıtýsııasynyń normalaryna sáıkes keltirý máseleleri boıynsha ózgerister men tolyqtyrýlar engizý týraly» Zańǵa ýaqtyly qol qoıǵanyn habarlady. Oǵan sáıkes, terrorlyq jáne basqa da asa aýyr qylmys jasaǵan qazaqstandyqtar azamattyǵynan aıyrylady.
Búgingi tańda shetelde lańkester lagerinde Qazaqstannyń 500 azamaty bar.
Qazirgi tańda Sırııa-Irak aımaǵynda terrorıstik toptar úshin jaǵdaıdyń qıyndap jatqanyn bilemiz. Qylmyskerler sheginý joldaryn, sonyń ishinde ózderiniń burynǵy turǵan jerlerine qaıtý múkindikterin izdestirýde. Alaıda, bul olardyń qylmystyq pıǵyldarynan bas tartqanyn bildirmeıdi.
Sondyqtan, qazaqstandyqtardyń ishinen shyqqan osyndaı adamdar qylmystyq tájirıbe jınaqtap, elimizge aram nıet-oımen oralýy múmkin. Osyǵan oraı, jańa tolyqtyrýlarda azamattyqtan aıyrý múmkindigi qarastyrylýda.
«Másele terrorızm aktilerin, terrorıstik toptardy qurý jáne basqarý men onyń qyzmetine qatysý, sondaı-aq respýblıkamyzdyń ulttyq jáne ómirlik mańyzy bar múddelerine asa aýyr zııan keltirý týraly bolyp otyr. Sot istiń mán-jaıyn, jasaǵan áreketiniń aýyrlyǵyn, keltirgen zardaptaryn tolyq zerdeleý negizinde erekshe jaǵdaılarda ǵana azamattyǵynan aıyrady», – dep naqtylady mınıstr.
Týǵan jerin tastap, shetelge terrorlyq qurylymdarǵa qatysýǵa ketken adamdar Otanyna opasyzdyq jasaǵandarǵa teńeledi.
