Polshanyń Ekonomıkalyq damý vıse-mınıstri Iаdevıka Emılovıch Qazaqstannyń damý qarqynyn joǵary baǵalap, áriptestiktiń eki elge de tıimdi ekenine toqtaldy.
«Qazaqstan naryǵy ‒ biz úshin óte úlken ári qyzyqty. Polıaktardyń qazaq jerine burynnan kelgenin tarıhtan bilemiz. Alaıda, qazirgi tańda Qazaqstan ‒ tarıhı ǵana emes, bolashaqtyń mekeni. Sondyqtan, biz ózimizdiń kásipkerlerdi Qazaqstanǵa ınvestısııa quıýǵa shaqyramyz», dedi Iаdevıka Emılovıch.
Polshadan kelgen delegasııaǵa ınvestorlarǵa jasalǵan jeńildikter týraly tanystyryldy.
«Astana Invest» ulttyq kompanııasynyń ınvestorlarǵa qyzmet kórsetý ortalyǵynyń dırektory Abaı Qojamjarovtyń aıtýynsha, jeńildik alýǵa múddeli ınvestordyń usynysy qanaǵattandyrylsa, ol Astanadaǵy arnaıy ekonomıkalyq aımaqqa múshelikke qabyldanady. Sondaı-aq, ınvestorlardyń ónimin syrtqa eksporttaý máselesi de qaralǵan.
Delegasııanyń málimetine súıensek, Polsha tarapy hımııalyq ónim shyǵarý, jıhaz jasaý sekildi ózderiniń oń jambasyna keletin salalarǵa den qoıýdy josparlap otyr. Iаdevıka Emılovıchtiń aıtýynsha, polshalyq ónimderdiń sapasy joǵary, baǵasy da eki tarapqa qolaıly eken.
«Selena Group» óndirisimen tanysqandar ınvestorǵa jasalǵan jaǵdaıdy joǵary baǵalady. Jalpy, bul kompanııaǵa ınvestısııa quıý jumysy 2013 jyly bastalǵan-dy. Joba qurylysy 2014 jyly qolǵa alynyp, oǵan 6 mıllıon AQSh dollary salynǵan edi. Byltyrdan beri zaýyt hımııalyq qurylys qospalaryn shyǵaryp keledi. Jobanyń óndiris qýaty orasan. Máselen, zaýyt jylyna 120 myń tonna qurǵaq qurylys qospasyn jáne 10 myń tonna dıspersııalyq qosyndy óndirýge qabiletti. Joba iske qosylǵaly beri jańa 70 jumys orny ashyldy. «Selena Group»-tyń qýaty Qazaqstandaǵy qurylys naryǵynyń 20 paıyzyn qospamen qamtamasyz etýge jetkilikti. Sonymen qatar, elimizdiń 8 qalasyna jetkizý júıesi ashylǵan.
Abaı ASANKELDIULY,
«Egemen Qazaqstan»
