Kórmege Karıb aımaǵyndaǵy 12 memleket kórneki buıymdaryn ákelgen. Barlyǵy bir jerge toptastyrylyp, kópshilik nazaryna usynyldy. Soltústik jáne Ońtústik Amerıka qurlyǵynyń arasynda ornalasqan Iаmaıka, Barbados, Sýrınam, Gaıtı syndy elder úshin dúnıejúzilik EKSPO kórmesine kelýdiń ózi zor mártebe. Sebebi, jer aýmaǵy shaǵyn bul memleketterdi álem keńirek bile bermeıdi. Sondyqtan osyndaı jahandyq jıyndar arqyly tarıhı-mádenı erekshelikteri pash etiledi.
Saltanatty rásimge Qazaqstan Respýblıkasy Syrtqy ister mınıstriniń orynbasary Erjan Ashyqbaev, Grenadanyń Densaýlyq saqtaý, qorǵaý jáne halyqaralyq bıznes mınıstri Nıkolas Stıl jáne halyqaralyq uıymdar ókilderi qatysty. Onda E.Ashyqbaev Karıb qoǵamdastyǵy ulttyq kúniniń merekelenýine qatysý zor mártebe ekendigin aıtyp, qoǵamdastyq delegasııasyna Qazaqstan úkimetiniń sálemin jetkizdi. «Biz – postkeńestik jáne Shyǵys elderi ishinde osyndaı ǵalamdyq deńgeıdegi 115 memleket pen 22 halyqaralyq uıym qatysqan halyqaralyq kórmeni uıymdastyrǵan alǵashqy elmiz. Bul – mamandandyrylǵan EKSPO kórmeleri tarıhyndaǵy qatysýshylar sany boıynsha eń joǵarǵy kórsetkish», degen Syrtqy ister mınıstriniń orynbasary elimizdiń munaı men gazdyń mol qoryna ıe bola tura, «jasyl» ekonomıkany damytýǵa basa mán beretinin alǵa tarty.
«Ekologııalyq teńestirilgen jáne udaıy damýǵa basa nazar aýdarǵan Qazaqstan úshin «Bolashaq energııasy» taqyryby óte mańyzdy. Kómirsýtekti qorlarynyń bar bolǵandyǵyna qaramastan elimiz 2050 jyly jalpy elektr qýatyn óndirýdiń jartysyna deıin jetkizýge múmkindik beretin jańǵyrtylatyn energııa kózderine belsendi aýysýda. Atalǵan maqsat bizdiń 2050 jylǵa deıingi strategııamyzda jáne «jasyl» ekonomıkaǵa kóshý tujyrymdamamyzda da bekitilip otyr», dedi E.Ashyqbaev.
Karıb qoǵamdastyǵyna múshe Grenadanyń densaýlyq saqtaý, qorǵaý jáne halyqaralyq bıznes mınıstri Nıkolas Stıl EKSPO-2017 halyqaralyq kórmesine qatysýǵa múmkindik bergen Qazaqstanǵa alǵysyn bildirdi. «Quramyna 15 el kiretin Karıb qoǵamdastyǵy, shamamen 14 mıllıon halqy bar shaǵyn óńir. EKSPO-2017 kórmesine KARIKOM-nan 12 el qatysýda. Qazaqstan úkimetine osy mańyzdy sharaǵa qatysý múmkindik bergeni úshin alǵysymyz sheksiz. Bul bizdi halyqaralyq kórmede tanystyrýǵa múmkindik berdi», dedi ol.
N.Stıl qoǵamdastyq keńistiginiń ereksheligin de atap ótti. «Pavılonymyz – kórmedegi jalǵyz birlesken pavılon. Ol sonysymen erekshelenedi. Sońǵy 17 jyl ishinde biz osyndaı sharalarǵa birlesip qatysyp kelemiz. Bul Karıb qoǵamdastyǵyna múshe memleketterdiń birligin dáleldeıdi», dep túıindedi sózin Grenadanyń densaýlyq saqtaý, qorǵaý jáne halyqaralyq bıznes mınıstri.
Sharanyń resmı bóligi aıaqtalǵan soń, Karıb qoǵamdastyǵyna múshe Grenadadan kelgen ártister qazaqstandyqtar men kórme qonaqtarynyń aldynda án aıtyp, ónerlerin kórsetti.
Karıb aımaǵy tek shıkizat túrlerin tasymaldaýmen aınalysady, tabıǵı qazba baılyq óndirmeıdi. Esesine, týrızm salasy keń qulash jaıǵan. Bul elder elektr energııasyn qymbat baǵada satyp alatyndyqtan, balamaly qýat kózine kóshýdi mejeli maqsat sanaıdy. Ol úshin keıbir aýyldyq mekenderine kún panelderin ornatyp, jel elektr stansalaryn iske qosqan.
