San ǵasyrlyq aqyl-oıdyń jemisin zerdeleýge den qoıǵan jastar respýblıkalyq, aımaqtyq sán baıqaýlarynda «júzden – júırik, myńnan – tulpar» shyǵyp, qomaqty tabystarǵa da qol jetkizip úlgerdi. Instıtýt ustazdary sándik-qoldanbaly óner buıymdaryn jasaýdy jete tanystyrý arqyly bolashaq mamandardyń kásibı sheberligin arttyrýdy kózdeıdi.
– Ortalyqta jastar kilem toqý, syrmaq syrý, kıim tigý sııaqty ata-babamyzdan mura bolyp kele jatqan bekzat ónerge mashyqtanady. Sonymen qatar, munda aǵash buıymdary men sándi shymyldyqtar, baý, basqur, sandyqqap, tegerish syndy kıiz úı jabdyqtary daıyndalady. Stýdentterge halqymyzdyń ǵasyrlar boıy jınaqtalǵan estetıkalyq, mádenı muralaryn tereń meńgertý arqyly olardyń tanymdyq kózqarasyn qalyptastyryp, qolónerge qyzyǵýshylyqtaryn oıatýdy kózdeımiz. Sondaı-aq, ulttyq kıim úlgilerindegi elementterdi jańa úlgidegi ulttyq kıimderge endirip, tyń brendtter qalyptastyrmaq nıettemiz, – dedi Kásiptik oqytý jáne dızaın kafedrasynyń meńgerýshisi Aınur Jaskılenova.
Aıbıke Hamıt pedagogıkalyq ınstıtýttyń «Kásiptik oqytý» mamandyǵynyń 4-kýrs stýdenti. Boıjetken sabaqtan tys ýaqytta ortalyqta dızaındyq kıim úlgilerin piship, qurastyrýǵa mashyqtanady.
– Búginde eńbek naryǵynda dızaıner mamandaryna degen qajettilik baıqalady. Sońǵy ýaqytta ulttyq qolóner buıymdaryna suranystyń artýy bul sózimizge aıqyn dálel bolmaq. Elimiz boıynsha sán ortalyqtary men sheberhanalar da kóptep ashylýda. Maqsatym – ata-baba dástúrin keńinen nasıhattaý arqyly zamandastarymdy tól ónerdi baǵalaýǵa, mádenı muramyzdy áspetteýge úndeý, – deıdi A. Hamıt.
Ortalyqta aıyna 10-nan astam kıim úlgisi tigiledi. Jas sheberler olardyń árqaısysynyń bir-birine uqsamaýyna erekshe nazar aýdarady. «Kóktem gúli», «Kerbez sulý», «Tomırıs», «Hanshaıym» sııaqty kózdiń jaýyn alatyn kıim kolleksııalaryn kópshilikke tanystyrý maqsatynda jyl saıyn shyǵarmashylyq jumystardyń kórmesin uıymdastyrý dástúrge aınalǵan.
– Memleket basshysy Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda babadan balaǵa mıras bolyp kele jatqan mádenı muralarymyzdy óskeleń urpaqqa jetkizýdi ıakı tanystyrýdy mindettegen bolatyn. Táýelsizdik jyldarynda tól jádigerlerimiz bolyp sanalatyn ulttyq kıimderimiz ben qolónerimizdi dáripteýge aıryqsha kóńil bóline bastady. «El ishi – óner kenishi» demekshi, aımaqtarda osy salany damytýǵa úles qosyp, ónerlerimen tanylǵan sheberlerdiń qarasy artty. Osy oraıda pedagogıkalyq oqý ornynda umyt bolyp bara jatqan tól dúnıelerimizben qaıta qaýyshtyrý ári jergilikti ismerlerdiń ózara tájirıbe almasýyna uıytqy bolý maqsatynda kórmeler, óner festıvaldary turaqty túrde ótkiziledi, – dep atap ótti oqý ornynyń Aqparattyq-ımıdjdik qyzmetiniń jetekshisi Jandar Asan.
