– Dál qazirgi sátte sizge «Kanelonyń» 16 qyrkúıekte Golovkınge qarsy ótetin jekpe-jegine kómektesetinimdi ǵana aıta alamyn. О́ıtkeni, Alvarestiń jattyǵý zalyna endi keldim. Qalaı daıyndalatynymyzdy, Saýlge qandaı kómek kórsetetinimdi ázirge bilmeımin. Negizi, Golden Boy promoýterligimen aǵam ári menedjerim Farhad Sharıpov kelisip bergen bolatyn. Ol kisige álemniń úzdik boksshysymen daıyndalýǵa, tájirıbe jınaýyma múmkindik jasaǵany úshin alǵys bildiremin. Menińshe, bul boks keshi orta salmaqtaǵy tarıhı jekpe-jekterdiń biri bolady.
Momynovtyń oıynsha, Golden Boy kompanııasy ony ádeıi tańdap alǵan. Sebebi, Bobyrjan Qazaqstanyń týmasy jáne Golovkınmen judyryqtasý stıli sáıkes keledi.
– Menińshe, olar meni ádeıi tańdap aldy. О́ıtkeni, meniń judyryqtasý tásilim Golovkınge uqsas. Sondaı-aq, ekeýmiz bir boks mektebiniń (Qaraǵandy) túlegimiz jáne ekeýmizdi de bir bapkerden tálim alǵanbyz. Golovkınmen uqsastyqtarymyz kóp, tek basqa salmaqta judyryqtasamyz.
Bobyrjannyń ózi Alvarespen sparrıng-seriktes bolǵanyn tarıhı oqıǵa dep sanaıdy. Sondaı-aq, ol eger ózin jaqsy qyrynan kórsetse, Golden Boy kompanııasymen kelisimshart jasaýy múmkin eken.
– «Kaneloǵa» sparrıng-seriktes bolý men úshin óte qýanyshty jańalyq boldy. О́ıtkeni, olar meni jaqsy kásipqoı boksshy retinde tanydy jáne Alvareske kómektese alatynyma kózderin jetkizgen soń shaqyryp otyr. Golden Boy Promotions-tiń sparrıng-seriktes bolýǵa shaqyrǵanynyń ózi men úshin tarıhı oqıǵa. Sondaı-aq, olar maǵan daıyndyq barysynda ózimdi jaqsy qyrymnan kórsete alsam, kelisimshart usynýdy ýáde etip otyr.
Ol «Kanelonyń» kásibı bokstaǵy eń mańyzdy jekpe-jegine, ıaǵnı óz jerlesine qarsy daıyndalýyna barynsha kómektesetinin, ony oryndaý mindetim dep sanaıdy.
– Bul jerde men úlken jaýapkershilikti sezinip otyrmyn. Moınyma qandaı júktiń artylyp otyrǵanyn da jaqsy bilemin. Men Alvareske barynsha kómektesýim kerek, sebebi bul meniń – mindetim. Eger men de osyndaı úlken kezdesý ótkizer bolsam, sparrıng qarsylastarymnyń aıanyp qalmaýyn qalar edim.
Sóz arasynda Momynov aldaǵy ýaqytta osyndaı jattyǵýlarǵa jıi baryp, tájirıbe jınaqtaıtynyn aıtyp qaldy.
– Bul meniń sońǵy sparrıng-jattyǵýym emes. Menedjerimniń aıtýy boıynsha, eger osy jattyǵýda ózimdi jaqsy qyrymnan kórsete alsam, aldaǵy ýaqytta osyndaı daıyndyqtarǵa jıi jiberip turatynyn aıtty. Bul men úshin úlken tájirıbe bolatyny sózsiz.
Aıta keteıik, Bobyrjan Momynov búginge deıin kásipqoı boksta úsh kezdesý ótkizip, barlyǵynda merziminen buryn jeńiske jetken.
