Sharada asa aýyr qylmys jasaǵany úshin azamattyqtan aıyrý múmkindigin qarastyratyn zańnamaǵa engizilgen ózgerister týraly sóz boldy. «Memleket basshysy «QR keıbir zańnamalyq aktilerine olardy QR Konstıtýsııasynyń normalaryna sáıkes keltirý máseleleri boıynsha ózgerister men tolyqtyrýlar engizý týraly» Zańǵa ýaqytyly qol qoıdy» degen Nurlan Ermekbaev endi terrorıstik jáne basqa da asa aýyr qylmys jasaǵan qazaqstandyqtar azamattyǵynan aıyrylatynyn aıtty. Búginde shetelderdegi lańkester lagerinde Qazaqstannyń 500 azamaty bar. Týǵan jerin tastap, shetelge terrorıstik qurylymdarǵa qatysýǵa ketken adamdar Otanyna opasyzdyq jasaǵandarǵa teńeledi.
Elbasy Qazaqstan Halqy assambleıasynyń XXV sessııasynda jáne ımamdarmen kezdesýi kezinde óziniń júris-turysymen, syrtqy kelbetimen qoǵamdy jikteýge tyrysatyn adamdardy aıyptaǵan edi. Azamattardy qandaı da bir dindi nemese dinı aǵymdy ustanýy boıynsha bólýge jáne óziniń dinı kózqarastaryn ádeıi jarnamalaýǵa jol bermeý týraly da az aıtylyp júrgen joq. Zań jobasynda qoǵamdyq jerlerde adamnyń bet-kelbetin tanýǵa kedergi keltiretin kıimderdi kııýge zańmen tyıym salý usynylady. «Qyzdardyń betterin tumshalap qara kóılek kııýi dástúrimizge de, ultymyzǵa da jat nárse. Bul bizdiń sana-sezimimizge de, zamanaýı damyǵan eldiń qoǵamdyq tártip pen qaýipsizdik talaptaryna da sáıkes kelmeıdi. Bul Taıaý Shyǵys elderiniń sol aımaqtyń aýa-raıy men turǵyndarynyń mádenı-tarıhı ádet-ǵuryptary men salt-dástúrinen týyndaǵan áıelderdiń dástúrli kıimi», - dep atap ótti mınıstr.
Semınarǵa qatysqan Atyraý oblysynyń ákimi Nurlan Noǵaev elimizdegi qoǵamdyq kelisim, saıası turaqtylyq, ultaralyq, dinaralyq kelisim Elbasy saıasatynyń jemisi ekenine toqtaldy. «Memleket basshysy árdaıym turaqtylyq máselesin, halyqtyń ál-aýqatyn arttyrýǵa baǵyttalǵan is-sharalardy júzege asyrýdy óz baqylaýynda ustap otyr. Oblysty mekendegen júzge jýyq ólt ókilderi, kóptegen konfessııa ókilderi birlikpen qyzmet atqaryp kele jatyr. Ár aımaqta jasalyp jatqan jumystar jóninde tájirıbe ortaǵa salynyp, pikir almasyp, ózekti máseleni birlesip sheshýge baǵyttalǵan mundaı sharalardyń mańyzy zor», - dedi N.Noǵaev.
Jıynda batys óńirindegi dinı ahýal jaıly keńinen aıtyldy. QR Bilim jáne ǵylym mınıstrligi mektepke deıingi jáne orta bilim departamenti dırektorynyń orynbasary Z. Maqsutova, Atyraý oblystyq prokýrorynyń orynbasary S. Shalabaev, Atyraý oblystyq Din isteri jónindegi basqarma basshysy Q. Kóshqalıev, Batys Qazaqstan oblystyq Din isteri jónindegi basqarma basshysy S. Ǵızzatov, Aqtóbe oblystyq Din isteri jónindegi basqarma basshysy J. Qalmaǵanbet, Mańǵystaý oblystyq Din isteri jónindegi basqarma basshysy E. Esbergenovter baıandama jasady. Jumys sapary barysynda mınıstr N. Ermekbaev quqyq qorǵaý organdarynyń basshylarymen, aýdandyq jáne oblystyq ákimdik janyndaǵy antıterrorıstik komıssııa tóraǵalarymen, destrýktıvtik dinı aǵymdy ustanýshylarmen kezdesti.
Baqytgúl BABASh,
«Egemen Qazaqstan».
ATYRAÝ.
