«Asa mártebeli Qazaqstan Respýblıkasynyń Prezıdenti Nursultan Nazarbaev myrza, joǵary koroldik qurmet retinde, Sizdi Katolıktik Izabella Ordenimen marapattaımyn», – delingen Koroldiń jarlyǵynda.
Qazaqstan Prezıdenti Ispanııa Koroli VI Felıpege jáne Ana Pastorǵa joǵary marapaty úshin rızashylyq bildirip, Qazaqstan men Ispanııa arasynda senimdi ári dostyq qarym-qatynas ornaǵanyn atap ótti.
– Biz táýelsizdigimizdiń alǵashqy kúnderinen bastap Ispanııa Koroldigimen baılanys ornatyp, ózara senimdi ekijaqty qarym-qatynastarǵa qol jetkizdik. Osy jyldar ishinde Ispanııa Qazaqstanǵa óz qoldaýyn kórsetip keledi. Ispanııa Koroli VI Felıpe Qazaqstanǵa resmı saparmen kelip, «EKSPO-2017» halyqaralyq kórmesiniń ashylýyna qatysty. Bul biz úshin zor mártebe, – dedi Qazaqstan Prezıdenti.
Nursultan Nazarbaev Qazaqstannyń saıasatta jáne ekonomıkanyń túrli sektorlarynda Ispanııamen jemisti yntymaqtastyqty jalǵastyrýǵa nıetti ekenin aıtty.
Rásim sońynda Qazaqstan Prezıdenti Ispanııa Koroli VI Felıpege shynaıy rızashylyǵy men jyly lebizin jetkizýdi surady jáne Ispanııa halqynyń ıgiligi úshin atqaryp jatqan qyzmetine tabys tiledi.
