Almaty oblysy, Alakól aýdanynda ótken dýatlon dodasyna QR Mádenıet jáne sport mınıstri Arystanbek Muhamedıuly qatysyp, jınalǵandardy jarystyń ashylý saltanatymen quttyqtady. Mınıstr básekege bastan-aıaq qantysyp, bolysyp qana qoımaı, jarys jolyna shyqqan 64 qatysýshynyń qatarynda sapqa turdy. Sonymen birge, bul sharaǵa arnaıy Olımpıada oıyndarynyń jeńimpazdary Ermahan Ibraımov, Danııar Eleýsinov jáne Ádilbek Nııazymbetov keldi.
Astana men Almaty qalasynan, oblys ortalyǵynan, sondaı-aq, osy ólkedegi bes aýdannan kelgen sportshylar týrıstik ólke sanalatyn Alakóldiń taza aýasynda sportpen aınalysý janǵa daýa degen pikirde. Dýatlonǵa qatysýshylar jarys jolyna 2 – 12 – 2 júıesi boıynsha shyqty. Iаǵnı, shaqyrymnan eki márte júgirý aralyǵyndaǵy 12 shaqyrymdy velosıpedpen baǵyndyrdy. Jarysta sportshylar jas erekshelikterine qaraı tórt topqa bólindi. Jarysqa kásipqoılarmen birge, Alakól jaǵasyna demalýǵa kelgen turǵyndar da qatysyp, jarys kórkin qyzdyrdy.
Ashylý saltanatynda QR Mádenıet jáne sport mınıstri Arystanbek Muhamedıuly, Alakól aýdanynyń ákimi Álibek Jaqanbaev, qurmetti qonaqtar – Olımpıada júldegerleri lebizderin jetkizip, óńir turǵyndaryn sportpen shuǵyldanýǵa, shaqyrdy.
Jarysqa halyqaralyq dárejedegi bas tóreshisi Iýrıı Portnıagın tórelik etken jarystyń úsh satysynan da súrinbeı ótken mınıstr júlde qorynan bas tartty. Velojarys pen júgirýden báseke qyzyp jatqan tusta Úsharal qalasynda ornalasqan Zeınep Qoıshybaeva atyndaǵy aýdandyq Mádenıet úıinde jergilikti ónerpazdar óner kórsetip jatty.
Jarys qorytyndysy boıynsha, 16 – 29 jas aralyǵynda Qudaıbergen Zeınollaev birinshi bolyp máre syzyǵyn kesti. Al 30 – 39 jastaǵy úmitkerler arasynda Qaırat Shaımýrdın, 40 – 49 jas aralyǵynda Sábıt Taımekenov top jardy. Jeńimpazdarǵa mınıstr altyn medal, Alǵys hattar men baǵaly syılyqtar tabys etti. Júldelerdi saltanatty tabystaý rásimine vıse-mınıstrler Sáken Musaıbekov pen Asqar Batalov, akter Ádil Ahmetov, sazger Renat Gaısın syndy sport pen óner juldyzdary da atsalysty.
Jeńimpazdardyń eń jasy Álem tórt, al Ádil bes jasta. Temirqulovtar otbasynan shyqqan aǵaıyndy qos búldirshindi Arystanbek Muhamedıuly ózi quttyqtap, qolyna kóterip qoshemet kórsetti. Mınıstr marapattaýdan keıin jýrnalısterge suhbat berip, Alakól aýdanynyń ákimdigine sporttyq sharany joǵary deńgeıde uıymdastyrǵany úshin alǵys aıtty. Sondaı-aq, Jetisýdyń jaquty sanalatyn Alakól jaǵasynda týrızmdi damytý kezek kúttirmeıtin másele ekenin tilge tıek etip, kól mańyndaǵy 500 myń adamdy qabyldaı alatyn 144 týrıstik nysan týraly keńinen túsindirip ótti.
Sporttyq shara aıaqtalǵan soń mınıstr jaǵajaıdaǵy kúrdeli jóndeý jumystarymen tanysyp, Aqtoǵaıdaǵy temirjol beketi men elektr poıyzynyń týrıster úshin mańyzdylyǵy týrasynda sóz qozǵady. Mınıstrdiń aıtýynsha, eger bul jobalar tolyq júzege asqan jaǵdaıda Qazaqstan men Reseıden keletin týrıster sany birneshe esege artpaq. Mınıstr sapar aıasynda Almaty qalasy men oblysta ornalasqan birneshe týrıstik agenttik jetekshilerimen, demalys aımaqtarynyń basshylarymen kezdesip, ishki týrızmdi damytý tóńireginde týyndaǵan saýaldarǵa jaýap berdi.
Almas NÚSIP,
«Egemen Qazaqstan»
Almaty oblysy
