– Birinshi oıynnan keıin, bir gol ǵana aıyrmashylyqpen utylýymyz bizge aýyr soqqany ras. О́z alańymyzda birinshi taımda azdap abdyrap qaldyq. Bapkerimiz Marek Zýbtyń nusqaýynan jańylyp qalǵandaı boldyq. Alaıda, úziliste jattyqtyrýshymyzdyń aqyl-keńesi kelesi 45 mınýtty jańa qarqynmen bastaýymyzǵa septigin tıgizdi. Endi jaýapty match basqasha baǵytta órbıdi dep úmittenemiz. Degenmen, «Astananyń» óz alańynda jeńilmeı kele jatqanyn da bilemiz. Bul kezdesýde biz jyldam gol jiberip alýdan saq bolýymyz kerek. Astanadaǵy oıynda Iýrmaladaǵy ekinshi taımdaǵy oıynymyzdy kórsetemiz dep oılaımyn.
– «Astanadan» kimdi erekshe atap óter edińiz?
– Birinshi kezekte qaptalda óner kórsetetin Patrık Tvýmasıdi erekshe atap óter edim. Onyń jyldamdyǵy, dáldigi qatty unaıdy. Oǵan qarsy Latvııa chempıonatynda birneshe ret oınadym. Onyń jyldan jylǵa damyp jatqanyn baıqaı túskendeı bolamyn. О́te jyldam ári tehnıkalyq jaǵynan myqty oıynshy. Qaı kezde qandaı sheshim qabyldaý kerek ekenin jyldam oılaı biledi. Soqqysy joıqyn. Sondaı-aq, Djýnıor Kabananganyń da orny erekshe. Naǵyz shabýylshyǵa tán qasıetter onyń boıynda bar dep senimdi túrde aıta alamyn. Budan bólek «Astananyń» ortalyq tusyndaǵy oıynshylardyń bir-birin kózben-aq túsinise bilýi tań qaldyrmaı qoımady.
– Iýrmaladaǵy oıynda 1500-2000 jankúıer ǵana boldy. Erteń sizder 30 myńǵa jýyq jankúıerdiń aldynda óner kórsetesizder. Jasandy alańy taǵy bar. Bul sizderge keri áserin tıgizbeı me?
– Menińshe, bul qaıta oń áserin berýi kerek. Stadıonǵa neǵurlym kóbirek adam jınalsa bolsa, oıynshynyń da bar qyrynan tanyla túsýine áserin beredi dep oılaımyn. Al jasandy alańǵa keler bolsaq, biz maýsymnyń basyn sıntetıkalyq alańda oınadyq. Sondyqtan bul da bizge esh qıyndyq týdyrmaıdy dep oılaımyn.
– Bas bapkerdiń komandadan ketýi ujymǵa keri áserin tıgizbeı me?
– Bul endi fýtbol ǵoı. Munda bári bolýy múmkin. Bapkerimniń komandadan ketip bara jatqany árıne ókinishti. Biraq árkimniń óz tańdaýy bar ǵoı. Bapkerime alǵystan basqa aıtarym joq. Birge júrip biraz kemshilikterimdi túzedim.
Aıan ÁBDÝÁLI,
«Egemen Qazaqstan»
