Qazaqstan halqy Assambleıasy Tóraǵasynyń orynbasary – Hatshylyq meńgerýshisi Darhan Myńbaı koreılerdiń «toǵyzynshy terrıtorııada» ómir súrip jatqanyna 80 jyl jáne Qazaqstan – Ońtústik Koreıa dıplomatııalyq qarym-qatynasyna 25 jyl tolyna oraı uıymdastyrylǵan forým eki el arasyndaǵy yntymaqtastyqtyń belgisi ekenin jetkizdi.
«Qazaqstandaǵy koreı halqy eldiń damýyna eleýli úles qosyp júr. Osy oraıda, biz álemniń ár elinen kelgen koreı kásipkerleriniń Astanaǵa jınalǵanyna qýanyshtymyz. Olardyń Qazaqstan baǵdarlamalaryna qyzyǵýshylyq tanytyp, áriptestik ornatýǵa múddeli ekenine senimdimin», – deıdi Darhan Myńbaı.
Koreıa Respýblıkasynyń Qazaqstandaǵy Tótenshe jáne ókiletti elshisi Kım De Sık eki el arasyndaǵy qarym-qatynasty nyǵaıtý úshin baryn salatynyn málimdedi.
«Qazaqstanǵa elshi bolyp kelgenime kóp bolǵan joq. Áıtse de, osy úsh aı ishinde Qazaqstannyń talaı belesterdi baǵyndyrǵanyna kózim jetti. Qazaqstan Prezıdenti Nursultan Nazarbaev ta Ońtústik Koreıanyń tájirıbesi týraly jıi aıtyp turatynynan habardarmyz. Bizdiń elde jaqynda jańa prezıdent saılandy. Koreıa basshysy Qazaqstanmen aradaǵy yntymaqtastyq baılanysty kúsheıtýdi maqsat etedi. Jańa elshi retinde osy jolda bar kúsh-jigerimdi aıamaımyn», – deıdi Kım De Sık.
Sharany «Qazaqstandaǵy koreıler assosıasııasy» Elbasy Nursultan Nazarbaevtyń «100 naqty qadam» jobasyn qoldaý maqsatynda, sondaı-aq, «EKSPO-2017» halyqaralyq kórme aıasynda uıymdastyrdy. Forýmǵa álemniń 10-nan astam elinen koreı kásipkerleri keldi. Sonymen qatar, Qazaqstan Parlamenti depýtattary, Investısııa jáne damý mınıstrligi ókilderi de shaqyryldy. Shet elderden at terletip kelgen meımandar Qazaqstan tarapy usynǵan baǵdarlamalarmen tanysty. Sonymen qatar, el bıznesmenderimen áriptestik ornatý jáne ınvestısııa salý máseleleri boıynsha jan-jaqty aqparat alyp, kelissózder júrgizý josparlanǵan. Uıymdastyrýshylardyń aıtýynsha, shetelden kelgen koreı kásipkerleri Qazaqstan naryǵyna qyzyǵýshylyq tanytyp, osynda jumys isteýge yqylas tanytypty.
Foto: 365info.kz
Abaı ASANKELDIULY,
«Egemen Qazaqstan»
