«Biraz jyldan beri qarbyz egýmen aınalysyp kelemiz. Ter tóge bilseń – jer ana nesibesin aıamaıdy. Biz ónimdi sapaly ári erte shyǵarýǵa tyrysamyz. Sondyqtan bolar qarbyzymyzǵa suranys jaqsy. О́zbekstandyq Rýstam Mamedov esimdi azamat jyl saıyn turaqty alýshymyz. Ol bizden satyp alyp, ary qaraı Reseıge jol tartady. Bıylǵy tabysymyzǵa kásibimizdi odan ári damytý josparymyz bar. Aldaǵy ýaqytta aýyldan jylyjaı ashyp, qyzanaq, qııar sekildi ónimdermen turǵyndardy qamtamasyz etsek dep otyrmyz», - deıdi Nursultan Esenbekov.
Jalpy aýdan boıynsha dıqanshylyqpen shuǵyldanyp, tabys taýyp júrgen jastar qatary az emes. Aýdandyq ishki saıasat bóliminiń basshysy Baýyrjan Shompıevtiń málimdeýinshe, aýdan ákiminiń 2017-2020 jyldarǵa arnalǵan «Jastardyń bos ýaqytyn tıimdi paıdalaný» jónindegi is-shara jospary bar. Osy jospar boıynsha jastarmen tıisti jumystar júrgizilip keledi. Bıylǵy jyly aýdan boıynsha 94 jas ózin-ózi jumyspen qamtyp, dıqanshylyqpen shuǵyldanyp jatyr. Olar 464 gektar alqapqa túrli daqyldar ekken. Búgingi tańǵa deıin osynaý belsendi jastar 800 tonnaǵa jýyq baqsha daqyldaryn jınap, satylymǵa shyǵardy. Jumystyń kózin tapqan aýdan jastary ary qaraı da memleketten jeńildetilgen nesıeler alyp, kásipkerlikterin dóńgeletpekshi. Jalyndy jastardyń bul áreketterine aýdan basshylary árdaıym qoldaý kórsetip otyrmaq.
